Թող հայությունն իմանա այս «քաջագործության» մասին. ո՞ւր են Եռաբլուրից անհետացել ծաղիկները

Oգոստոսի 7-ը պատմական «Կարին» գործողության հիշատակի օրն էր: Ուղիղ 43 տարի առաջ՝ 1982 թվականին, այդ գործողությունը իրականացրեցին ԱՍԱԼԱ-յի՝ Հայաստանի Ազատագրության Հայ Գաղտնի Բանակի «Խրիմյան Հայրիկ» մահապարտների ջոկատի անդամները:

Այդ օրը` Անկարայի «Էսեմբողա» օդանավակայանի ոստիկանատան բաժանմունքի վրա կատարած հարձակման ժամանակ ծանր վիրավորվել եւ ուշագնաց վիճակում գերի է ընկել Լեւոն Էքմեքչյանը, ում ամիսներ անց` 1983թ. հունվարի 29-ին, թուրքերը Անկարայի «Մամաք» բանտում կախաղան են հանել: Նույն գործողության ընթացքում, երբ զինամթերքը սպառվել է, ինքնասպան է եղել ջոկատի հրամանատար Զոհրապ Սարգսյանը, ով վերջին փամփուշտը պահել էր իր համար: Այս մասին հիշեցրել է գրող, հրապարակախոս ԱԼԼԱ ՀԱԿՈԲՅԱՆԸ եւ ընդգծել, որ Եռաբլուրում՝ նրանց հիշատակի օրը հարգանքի տուրք մատուցելիս առավոտյան հանդիպել է Լեւոն Էքմեքչյանի հարազատներին ու բարեկամներին, որոնք վարդեր են խոնարհել Լեւոնի, Զոհրապի եւ մյուս նվիրյալների շիրմաքարերին... «Իրավունք»-ը տիկին Հակոբյանից պարզեց, որ ինքն էլ անձամբ ծաղիկներով է գնացել հերոսների մոտ:

Ավելի ուշ տեղեկացանք, որ նույն օրը Հայաստանի Ազատագրության Հայ Գաղտնի Բանակի հերոսների շիրիմներին այցելել են նաեւ ԱՍԱԼԱ-յի ողջ հերոսները եւ, պարզապես, մի շարք հայրենասերներ: Բնականաբար, նրանք էլ են եղել ծաղիկներով: Իսկ ահա ուշ երեկոյան «Իրավունք»-ը Եռաբլուրից տեսանյութ էր հրապարակել, որտեղ ընդամենը մի քանի մեխակ էր դրված հերոսների շիրիմներին… Մեր տարակուսանքը, թե ինչպես է սա հնարավոր, հակառակը փաստեց Ալլա Հակոբյանը, որը լուսանկարել էր առավոտյան շիրիմների վրա խոնարհված ծաղիկները: Մինչդեռ դրանք ուշ երեկոյան փաստացի չկային…

«Մեր Հայաստանը» ֆեյսբուքյան էջն անդրադարձել է առեղծվածին եւ մանրամասնել. «Օգոստոս 7-ին, Հայաստանի Ազատագրութեան Հայ Գաղտնի Բանակ / ԱՍԱԼԱ-ի նահատակների հիշատակի օրվա կապակցությամբ «Եռաբլուրի» տարածքում գտնվող հուշահամալիր այցելած, եւ նրանց կողմից նահատակների շիրիմնաքարերի վրա խոնարհված ծաղիկները, տարածքը հսկող ռազմական ոստիկանութեան զինծառայողների կողմից  հապճեպ կերպով հավաքված են.... Թող հայությունն իմանա այս «քաջագործության» մասին»։

Այս խայտառակ պատմությանն ավելի կոշտ է արձագանքել գրականագետ, արվեստի վաստակավոր գործիչ ԿԱՐՈ ՎԱՐԴԱՆՅԱՆԸ:

«Ռազմական ոստիկանություն… Հուսով եմ՝ ծաղիկները տարել են վերավաճառելու կամ երեկոյան «աշխատանքից» հետո՝ նվիրել են իրենց… կանանց», - նշել է նա:

Հավելենք, որ պատրաստ ենք հրապարակել մատնանշված կողմի պարզաբանումը, եթե այդպիսին կլինի՝ ողջախոհության սահմաններում:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝