Մենք չենք կարող անտեսել Ալիեւի վերջին հայտարարությունները. Գրիգորի Այվազյան

Ադրբեջանի Միլլի Մեջլիսը երկրորդ ընթերցմամբ  ընդունել է Նախիջեւանի Ինքնավար Հանրապետության սահմանադրության մեջ փոփոխություններ կատարելու մասին օրենքի նախագիծը։ Ըստ APA-ի, Ադրբեջանի սահմանադրության 134-րդ հոդվածի 3-րդ մասում նշված այն դրույթը, որ ինքնավար հանրապետությունը Ադրբեջանի անբաժանելի մասն է, կարտացոլվի նաեւ Նախիջևանի սահմանադրության նախաբանում։ Սահմանադրական օրենքի նախագծում նախատեսված փոփոխություններից մեկն էլ վերաբերում է Նախիջեւանի բարձրագույն պաշտոնատար անձի բացառմանը: Ի՞նչ նպատակ է հետապնդում Ադրբեջանը, եւ արդյոք սա նույնպես պետք է դիտարկել Սյունիքի` նրանց միջանցքային տրամաբանության համատեքստում, «Իրավունք»-ը հետաքրքրվեց Ադրբեջանահայերի ասամբլեայի նախագահ, կովկասագետ, պ.գ.թ. ԳՐԻԳՈՐԻ ԱՅՎԱԶՅԱՆԻՑ:

— Ադրբեջանը սահմանադրական մակարդակով զավթում է նաեւ պատմական ձեւաչափերը։ Այն փաստը, որ ադրբեջանական առաջին հանրապետությունը հայտարարվել էր նաեւ Տավուշի ու Սեւանի արևելյան տարածքների շուրջ, այժմ օգտագործվում է որպես հիմնավորում՝ Զանգեզուրը համարելու որպես «պատմական ադրբեջանական» տարածք։

Այս ամենը նշանակում է, որ Ադրբեջանը երբեք չի հրաժարվի Զանգեզուրը բռնազավթելու փորձերից։ Բացի այդ, ի նշան իրական գործնական ծրագրերի, Բաքուն արդեն ավարտում է երկաթուղային ենթակառուցվածքը՝ Արցախից դեպի Հայաստանի սահմանի ուղղությամբ՝ ակնկալելով ապագա վերահսկողություն այդ տարածքի վրա։

Եվ չպետք է մոռանալ՝ ամբողջ այս կոնցեպտը ուղեկցվում է նաեւ տարածաշրջանային ռազմաքաղաքական զարգացումներով։ Իրանի ու Իսրայելի հարաբերությունների սրացումը կարող էր բերել իրավիճակի, երբ Ադրբեջանը զինված ուժերով ուղղակի հարված հասցներ Զանգեզուրին՝ ոչ թե Իրանի դեմ, այլ՝ հենց Հայաստանի։ Այդ պլանը, կարծես, առկախվեց Իրանի դիրքորոշման եւ դիմակայելու պատրաստակամության արդյունքում։

Եվ բացի այդ, մենք չենք կարող անտեսել Ալիեւի վերջին հայտարարությունները միջազգային հարթակներում, որոնք վկայում են, որ պատերազմը չի ավարտվել։ Ուստի՝ Հայաստանը պետք է պատրաստ լինի ցանկացած սցենարի։ Մեր առաջնահերթությունն է չեզոքացնել Ադրբեջանի պնդումները՝ «արեւմտյան Ադրբեջան», «վերադարձ» եւ «պատմական իրավունք» եզրույթներով, որոնք ուղղված են ոչ միայն տարածքների, այլեւ` հայկական ինքնության դեմ։

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝