Ինչպե՞ս խուսափել ֆոտոմաշկաբորբից. ԱՆ

Արևի ճառագայթները երբեմն կարող են «թշնամի» դառնալ մեր մաշկի համար` առաջացնելով մաշկային խնդիրներ, հայտնում է Առողջապահության նախարարությունը:

«Ֆոտոմաշկաբորբը (արևի լույսի նկատմամբ գերզգայուն մաշկային արձագանք) դրանցից մեկն է։ Այն հազվադեպ երևույթ չէ․ ըստ միջազգային հետազոտությունների` արևային սեզոնի ընթացքում բնակչության 10–20%-ը կարող է առնչվել տարբեր ձևերի ֆոտոմաշկաբորբերի։

Ինչո՞ւ է այն առաջանում.
Սա մաշկի բորբոքային պատասխանն է արևի ուլտրամանուշակագույն ճառագայթման հանդեպ, որը կարող է ուժեղանալ, եթե մեր օրգանիզմում կան որոշակի նյութեր կամ արտաքին գործոններ, որոնք «թուլացնում» են մաշկի պաշտպանությունը․
որոշ դեղեր (հակաբիոտիկների, ցավազրկողների, միզամուղների որոշ խմբեր),
 բուսական որոշ եթերայուղեր ու քսուքներ (օր.՝ նարդոս (лаванда), ցիտրուսներ և այլն),
 որոշ մաշկային հիվանդություններ կամ գենետիկ նախատրամադրվածություն,
 ալերգիկ ռեակցիաներ:

Նպաստող գործոններ, որոնց պետք է ուշադրություն դարձնել.
 առանց պաշտպանիչ միջոցների (գլխարկ, պաշտպանիչ հագուստ) արևի տակ երկարատև մնալը,
սոլյարիի հաճախակի օգտագործումը,
 քսուքներ կամ դեղեր, որոնց ազդեցության մասին չենք խորհրդակցել բժշկի հետ:

Ինչպե՞ս ճանաչել ֆոտոմաշկաբորբը.
Եթե արևից հետո մաշկի վրա նկատում եք՝
 կարմրություն, այրոց, քոր,
մանր ցան կամ բշտիկներ,
 այտուցվածություն կամ թեփոտում, ապա դիմե՛ք մաշկաբանի։ Մի՛ փորձեք ինքնուրույն բուժել կամ «տնային միջոցներ» օգտագործել, քանի որ դրանով հաճախ ավելի եք խորացնում խնդիրը։

Ինչպե՞ս խուսափել ֆոտոմաշկաբորբից.
օգտագործե՛ք SPF 50 կամ ավելի բարձր արևապաշտպան քսուք ամեն օր (նույնիսկ ամպամած եղանակին),
 կրե՛ք բաց գույների, թեթև, բայց ծածկող հագուստ,
 խորհրդակցե՛ք բժշկի հետ, եթե ընդունում եք որևէ նոր դեղամիջոց,
 խուսափե՛ք ինքնուրույն քսուքներ կամ բուսական թուրմեր օգտագործելուց, եթե պատրաստվում եք երկար մնալ արևի տակ:

Հիշե՛ք`ֆոտոմաշկաբորբը բուժելի է, իսկ ճիշտ կանխարգելմամբ՝ խուսափելի: Եթե նկատել եք նման նշաններ, դիմե՛ք մաշկաբանի։ Առողջ մաշկը ձեր ամենօրյա հարմարավետության ու կյանքի որակի կարևոր մասն է։

ԱՆ խորհրդատու մաշկաբանության և վեներոլոգիայի գծով
Հովհաննես Հովհաննիսյան»,-ասված է հաղորդագրության մեջ:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝