Առջեւում միջազգային մրցարշավ է, որտեղ ներկայանալու ենք 10 մարզիկով. Սամվել Համբարձումյանը

Երկրի ամրությունը՝ հիմքն է, իսկ հիմքը ճիշտ դաստիարակված սերունդը: Պատահական չէ, որ ամեն մարդ մարզիչ չի կարող դառնալ: Մարզիչները ընտրյալներ են եւ դրանք լոկ խոսքեր չեն: Իրական մարզիչն ապացուցում է իր կերտածով, իր տվածով եւ սաներով:
Մեր օրերի իրական մարզիչներից մեկը՝ Հայկ Ղուկասյանը շարունակում է իր նվիրական գործը՝ կրթելը, ուսանելն ու չեմպիոններ դարձնելը:
Հայկ Ղուկասյանի սաներից մեկը՝ Սամվել Համբարձումյանը, չնայած տարիքին, արդեն իսկ ունի բավականին լուրջ նվաճումներ եւ գրանցած հաղթանակներ: Սամվելի սերը դեպի սպորտ եղել է դեռ մանկուց՝ վեց տարեկանից: Սակայն ինչո՞ւ նման դժվար եւ ուժային սպորտաձեւ, փորձեցինք պարզել անձամբ մարզիկից:

-Ինչո՞ւ որոշեցիք զբաղվել հենց «ԱրմՖայթինգ» մարզաձեւով:

-Ես իմ ողջ կյանքը եղել եմ հարվածային մարզաձեւի մեջ: Հավանաբար նման կերպ եմ զգացել եւ տեսել ինձ սպորտում: Այժմ մարզիչս Հայկ Ղուկասյանն է, ում անչափ շնորհակալ եմ հաջողություններիս համար: Այն մարզային բազան եւ գիտելիքները, որը տալիս է ինձ պարոն Ղուկասյանը, դա ոչ միայն կրթություն է տվյալ մարզաձեւում, այլ նաեւ ինքնավստահություն է եւ ուժ: Մոտավորապես մեկ տարուց ավելի է ինչ մարզվում եմ Գլենդելի «Եսանի» սպորտ ակումբում՝ Հայկ Ղուկասյանի մոտ եւ նրա շնորհիվ այսօր արդեն գրանցել եմ նմանատիպ արդյունքներ: Հանդես եմ գալիս շոու մենամարտերում, որտեղ իրենց ուժերն են չափում փորձառու մարզիկները: Ինձ արդեն ներգրավվում են նմանատիպ մրցումների մեջ, քանի որ ունեմ բազում հետեւորդներ, թե հայ, եւ թե այլ ազգի, ովքեր գնահատում են իրական սպորտը:

-Ի՞նչ արդյունքների մասին է խոսքը, Սամվել, գուցե փակագծերը բացեք:

-Մայիսի 10-ին կայացավ մենամարտ, որը հաղթեցի նոկաուդով: Մրցակիցս մեքսիկացի տղա էր, ով բավականին լավ պատրաստված էր: Սակայն կարողացա հաղթահարել նրա ուժը եւ ինչպես արդեն ասացի, նոկաուտի ենթարկեցի: Դա իմ մեկուկես տարվա ընթացքում ձեռք բերած գիտելիքի, քրտնաջան աշխատանքի արդյունքն էր:

-Սամվել, ո՞վ Ձեզ խորհուրդ տվեց մարզվել Հայկ Ղուկասյանի մոտ:

-Լինելով տվյալ սպորտաձեւի սիրահար եւ հետեւելով պարոն Ղուկասյանին, տեսնելով, թե ինչ արդյունքներ են գրանցում նրա սաները, թե Հայաստանում եւ թե ԱՄՆ-ում, ընտրությունս միանշանակ էր: Այլ տարբերակի մասին անգամ չեմ էլ մտածել:

-Մոտ ապագայում սպասե՞նք նոր մրցումների:

-Այո, սեպտեմբերի 14-ին պետք է մասնակցեմ ԱՄՆ-ում՝ «Արբատ» ռեստորանային համալիրում կայանալիք միջազգային մրցաշարին եւ բնականաբար, հիմա առավել լծված ենք ես եւ մարզիչս մեր մարզումներով: Հաղթանակի մասին խոսելը վաղ է, սակայն ինչպես ասում է Հայկ Ղուկասյանը, վստահությունը, համառությունը գործի կեսն է: Ի դեպ, միայն ես չեմ լինելու պարոն Ղուկասյանի սաներից: 10-ից ավելի մարզիկներով պատրաստվում ենք մրցաշարին:

Մեզ մնում է հաջողություն մաղթել մեր քաջ հայորդուն եւ նրա մարզչին, հետագայում լուսաբանելու ակնկալիքով, քանի որ վստահաբար կարող ենք ասել, որ նման երիտասարդներ, ինչպիսիք Սամվելն է եւ շատերը, դեռ հպարտանալու առիթներ կստեղծեն, ի շնորհիվ գրագետ մարզիչ՝ Հայկ Ղուկասյանի:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝