Հայաստանի բյուջեն շահե՞ց Լոպեսով, թե՞...

Երեւանում՝ Վազգեն Սարգսյանի անվան հանրապետական մարզադաշտում, տեղի ունեցավ համաշխարհային մեգաաստղ ՋԵՆԻՖԵՐ ԼՈՊԵՍԻ համերգը, որի համար Հայաստանի կառավարությունը 6 միլիոն ԱՄՆ դոլար ներդրում էր կատարել:

Իհարկե, չափազանց հետաքրքիր է բոլորին, թե ՋեյԼոն ի՞նչ է ուտելու 2 օրվա մեջ, որը կազմելու է 37 հազար դոլար, եւ այդքան ուտելուց հետո, ինչպես է հաջողվում 50-ն անց արտիստին մնալ այդքան սլացիք, այդպես էլ չիմացանք: Հարկ է նշել նաեւ, որ նրա թիմի սննդի համար 6 միլիոն դրամ է առանձնացվել, զգեստափոխման սենյակի աշխատակիցների համար՝ 3.8 միլիոն դրամ:

Համերգը, որին մասնակցել է մոտ 24 հազար հանդիսատես ՝14 հազար նստատեղ եւ 10 հազար կանգնելու տեղ, ըստ ՔՊ-ական պատգամավոր Արսեն Թորոսյանի հաշվարկի, բերել է 10,071,320 ԱՄՆ դոլար ընդհանուր հավելյալ արժեք: Ինչպես հայտնում են, այդ գումարի մեջ ներառվում է 3,891,320 դոլար տոմսերի վաճառքը: Համերգին ներկա են եղել15 հազար զբոսաշրջիկ եւ 9 հազար տեղացի, 6 միլիոն դոլար զբոսաշրջիկների ծախսերից, յուրաքանչյուրը՝ 400 դոլար, իսկ տեղացիների ծախսերից՝  180 հազար դոլար, յուրաքանչյուրը՝ 20 դոլար:

6 միլիոն դոլարի ներդրումը հանելուց հետո՝ զուտ շահույթը կազմում է 4,071,320 դոլար, իսկ ներդրումների վերադարձը (ROI)՝ 67.86 տոկոս:

Բացի այդ, համերգը Հայաստանին բերել է 2 միլիոն դոլար տեսանելիության արժեք՝ խթանելով զբոսաշրջությունն ու միջազգային ճանաչումը: Այս վերլուծությունը կատարվել է Գրոկի կողմից՝ xAI-ի ստեղծված արհեստական բանականությամբ:

Բիզնեսի տեսանկյունից, եթե հավատանք տվյալ հաշվարկներին, Հայաստանի բյուջեն, անշուշտ, շահույթով է դուրս եկել, իսկ Ջենիֆեր Լոպեսի երկրպագուները ստացել են անկրկնելի հաճույք: Սակայն, չհեռանալով իրականությունից՝ հարկ է նշել, որ հայությունը մեգաաստղի ժամանումն այդքան էլ միանշանակ չի ընդունել՝ եղել են ե՛ւ դժգոհողներ, որոնք նախընտրել են 6 միլիոնն այլ խնդիրների վրա ծախսել, հիշելով Գյումրին, անապահով ընտանիքներին եւ այլն: Կրկին, այս անգամ էլ Ջենիֆեր Լոպեսի շնորհիվ ազգաբնակչությունը բաժանվեց երկու մասի եւ հնչեցին փոխադարձ վիրավորանքներ: Նույնիսկ վիրավորանքներից զերծ չմնաց աստղը, ով, բարեբախտաբար, հայերեն կարդալ չգիտի: Այնուհանդերձ, ՋեյԼոյի համերգը այլեւս պատմություն է եւ թերեւս շատ այլ երկրների համար նույնիսկ՝ երազանք:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝