«Լաբուբու» խաղալիքի մոլուցքը Չինաստանում նոր բիզնես է առաջացրել

«Լաբուբու» խաղալիքի մոլուցքը Չինաստանում նոր բիզնես է առաջացրել՝ ««Լաբուբու»-ի բժիշկներ», որոնք վերանորոգում են այդ տիկնիկները, երբ դրանք վնասվում են: South China Morning Post-ի տվյալներով՝ վերանորոգման արժեքը կազմում է խաղալիքի գնի 10%-ը. սովորական, ոչ կոլեկցիոն  Լաբուբուն Չինաստանում միջինում արժե 14 դոլար:

Ինչպես նշում է հրատարակությունը, նման տիկնիկները նորաձև թրենդների սիրահարները հաճախ կրում են իրենց ձեռքի պայուսակների վրա, ինչը հաճախ հանգեցնում է ֆիգուրների վնասմանը։ 

Տիկնիկները նաև կեղտոտվում են, և ««Լաբուբու»-ի բժիշկները» օգնում են վերականգնել դրանց մաքրությունը: Չինաստանում սոցիալական ցանցերի օգտատերերը կիսվում են քերծվածքները հեռացնելու և տիկնիկների մորթին փայլեցնելու խորհուրդներով, բայց ««Լաբուբու»-ի բժիշկները» դա անում են մասնագիտորեն:

Թերթը մեջբերում է նման «բժշկի», որն իրեն Հարթման է անվանում: Նա պատմել է, որ միայն վերջին մեկ ամսվա ընթացքում վերանորոգել է մոտ 100 «Լաբուբու»: Հարթմանը թերթին ասել է, որ իրեն զգում է «բժիշկ, որը բուժում է հիվանդություններ և փրկում կյանքեր»:

Խաղալիքը ստեղծվել է Հոնկոնգում ծնված դիզայներ և գրող Լոնգ Ջիաշենգի (Կասինգ Լանգ) կողմից։ 2015 թվականին նա սկսել է «Հրեշներ» վերնագրով կարճ պատմվածքների շարք, որը մեծապես ազդված էր սկանդինավյան դիցաբանությունից: 2019 թվականին Լոնգ Ջիաշենգը համագործակցություն է սկսել Pop Mart-ի հետ՝ իր կերպարների հիման վրա տիկնիկներ արտադրելու համար:

«Լաբուբու»-ն արտադրվում է ավելի քան 300 տարբեր գույներով, ձևերով և չափսերով: 2024 թվականին «Հրեշները» դարձավ Pop Mart-ի ամենատարածված շարքը՝ 726.6% եկամտի աճով, հասնելով 3.04 միլիարդ յուանի (ավելի քան 423 միլիոն դոլար) վաճառքի:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝