Հզոր երկրաշարժ և ցունամի է տեղի ունեցել Կամչատկայում. ցունամին սպառնում է անգամ ԱՄՆ-ին

Կամչատկայի մոտակայքում տեղի է ունեցել 8.7 մագնիտուդով երկրաշարժ։ Ցնցումները զգացվել են նաև Սախալինում։

Երկրաշարժի ուժի մասին է վկայում այն, որ եկեղեցու զանգակատունն այնպես է ճոճվել, որ զանգերը սկսել են ղողանջել (Տեսանյութում)

«Նախնական տեղեկությունների համաձայն՝ զոհեր չկան։ Բոլոր ծառայությունները բնականոն աշխատում են», - հայտնել է տարածաշրջանային արտակարգ իրավիճակների նախարարությունը։

Ռուսաստանի գիտությունների ակադեմիան նշել է, որ այս երկրաշարժը ամենաուժեղն է 1952 թվականից ի վեր։

«Ուժեղ, նկատելի հետցնցումները կշարունակվեն առնվազն ևս մեկ ամիս։ Դրանց մագնիտուդը կարող է հասնել մինչև 7.5-ի, Պետրոպավլովսկ-Կամչատկայում դրանք կարող են առաջացնել մինչև 6 մագնիտուդով ցնցումներ», - հավելել են գիտնականները։

Երկրաշարժից հետո սպասվում էր, որ Սևերո-Կուրիլսկի ափամերձ գոտին կհարվածի ցունամիի երեք ալիք։ Այս մասին Telegram ալիքով հայտնել է նահանգապետ Վալերի Լիմարենկոն։

«Բնակավայրի բնակիչները մնում են անվտանգ բարձրադիր վայրերում, մինչև կրկնվող ալիքների սպառնալիքը լիովին վերացվի», - գրել է նա։

Ցունամիի վտանգ է սպասվում ԱՄՆ-ում, որի մասին հայտնել է Թրամփը` գրելով.

«Խաղաղ օվկիանոսում տեղի ունեցած հզոր երկրաշարժի պատճառով Հավայան կղզիների բնակիչների համար ուժի մեջ է ցունամիի մասին նախազգուշացում: Ցունամիի մասին նախազգուշացում է նաև Ալյասկայի և ԱՄՆ-ի Խաղաղօվկիանոսյան ափի համար: Ճապոնիան նույնպես սպառնալիքի տակ է: Ուժեղ մնացեք և հոգ տարեք ձեր մասին»:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝