Կաթողիկոսի դեմ գործողությունը ոտնձգություն կլինի ՀԱԵ-ի ինքնավարության դեմ. Գերմանական թեմ

Հայ առաքելական եկեղեցու Գերմանիայի թեմը կոչ է անում երկրի իշխանություններին հարգել եկեղեցու անկախությունը և պահպանել իրավունքի և արդարադատության սկզբունքները։ Այս մասին ՌԻԱ Նովոստիին ասել է Բադեն-Վյուրտեմբերգի հայ համայնքի հոգևոր հովիվ Տիրատուր Սարդարյանը։

Ավելի վաղ Փաշինյանը հրապարակել էր Ամենայն հայոց կաթողիկոսին գահընկեց անելու ծրագիր, ինչի մասին գրում է սոցցանցերում մեկ ամսից ավելի։ Այդքանով չի սահմանափակվել և հայտարարել է ՀԱԵ-ի կանոնադրությունը փոխելու իր մտադրության մասին, որպեսզի այն դառնա «կարճ և հասկանալի փաստաթուղթ բոլորի համար»։

Հոգևոր հովիվը նշել է, որ Գարեգին Բ-ի դեմ գործողությունները կլինեն աննախադեպ ոտնձգություն եկեղեցու ինքնավարության նկատմամբ՝ խորը ցնցման մեջ գցելով ինչպես ՀՀ քաղաքացիներին, այնպես էլ աշխարհի տարբեր ծայրերում գտնվող հայերին։

«Կաթողիկոսի կամ եկեղեցու կանոնական հիմքերի նկատմամբ ցանկացած ոտնձգություն կլիներ ոտնձգություն ոչ միայն եկեղեցու, այլև հայ ազգի հոգևոր և մշակութային հիմքերի նկատմամբ», – ասել է Սարդարյանը։

Նա ընդգծել է, որ Գարեգին Բ-ն ՀԱԵ ընտրված ղեկավարն է, և նրա ընտրությունը հիմնված է եկեղեցու դարավոր կանոնական ավանդույթների վրա, որոնք բացառում են պետության ցանկացած միջամտություն։ Իսկ այս գործընթացում պետության դերը ուժեղացնելու վերաբերյալ Փաշինյանի կողմից ներկայացված առաջարկները հակասում են ոչ միայն ՀԱԵ–ի եկեղեցական կարգին, այլև ՀՀ Սահմանադրությանը, որը երաշխավորում է եկեղեցու և պետության բաժանումը, և դավանանքի ազատության միջազգային չափանիշներին։

Հիշեցնենք` ՀՀ վարչապետ Նիկոլ Փաշինյանը մայիսի 29-ին կառավարության նիստի ժամանակ քննադատեց եկեղեցիների վիճակը՝ անվանելով դրանք «չուլանացված և աղբով լի»։ Հունիսի 2–ին նա հայտարարեց` եթե պարզվի, որ Գարեգին Բ–ն իսկապես խախտել է կուսակրոնության ուխտը և զավակ ունի, նա չի կարող լինել Ամենայն հայոց կաթողիկոս։ Նա գրեթե ամեն օր գրառումներ է անում սոցցանցում` պահանջելով, որ կաթողիկոսը հեռանա։

Գարեգին Երկրորդը հունիսի 22-ին հայտարարեց, որ ՀՀ իշխանությունների սանձազերծած հակաեկեղեցական արշավը լրջագույն սպառնալիք է ազգային միաբանությանը, երկրի ներքին կայունությունն ու ուղիղ հարված հայոց պետականությանը:

Հունիսի 25-ի լույս 26-ի գիշերը կալանավորվեց «Սրբազան պայքար» շարժման առաջնորդ Բագրատ արքեպիսկոպոս Գալստանյանը («հեղաշրջման գործով»)։

Հունիսի 27-ին ՀՀ ազգային անվտանգության ծառայության հատուկջոկատայինները մտան Մայր աթոռ Սուրբ Էջմիածին՝ վեհարանի բակ՝ ձերբակալելու Շիրակի թեմի առաջնորդ Միքայել արքեպիսկոպոս Աջապահյանին, ապա հեռացան։ Աջապահյանն ինքը ներկայացավ ՔԿ։ Հունիսի 28-ին նա կալանավորվեց։ Նրա նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։

Փաշինյանը հուլիսի 8-ին հայտարարեց, որ պատրաստ է անձամբ առաջնորդել Մայր աթոռ սուրբ Էջմիածնի «ազատագրումը»` նշելով, որ «Միածնի իջման վայրը զավթված է հակաքրիստոս, շնաբարո, ապազգային, ապապետական մի խմբակի կողմից»։ Մինչ այդ նա գրել էր, որ Վաղարշապատ խոշորացված համայնքի որեւէ տարածք չի կարող իրավապահների գործունեության համար փակ լինել։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝