Հայաստանի նախկին վարչապետ Կարեն Կարապետյանի ընտանիքին պատկանող «Ֆլորենս» ռեստորանն արգելանքի տակ է.Factor.am

Հայաստանի նախկին վարչապետ Կարեն Կարապետյանի ընտանիքին պատկանող «Ֆլորենս» ռեստորանն արգելանքի տակ է։ Այս մասին գրում է Factor.am-ը։

Factor.am-ը այս մասին տեղեկացել է իրավաբանական անձանց պետական ռեգիստրից։ Ըստ աղբյուրի՝ դեռ 2023 թվականից «Ֆլորենս Գարդեն» ՍՊԸ-ն երկու տարբեր վարույթներով պետք է պետական բյուջե վճարեր ընդհանուր 563 հազար դրամ, ինչը չի կատարվել։

«Ֆլորենս Գարդեն» ՍՊԸ-ն, ըստ նույն աղբյուրի, պատկանում է «Գոլդ Ռեստ» ընկերությանը, որի բաժնեմասի 65 տոկոսը պատկանում է նախկին վարչապետի որդուն՝ Տիգրան Կարապետյանին։ Վերջին օրերին Կարապետյանների ռեստորանը հայտնվել է իրավապահների ուշադրության կենտրոնում, դադարեցված է գործունեությունը, չեղարկվում են ամրագրումները։

Քննչական կոմիտեի մամուլի խոսնակ Կիմա Ավդալյանը Factor.am-ին հայտնեց, որ ռեստորանում կատարվել են քննչական գործողություններ՝ խուլիգանության դեպքի առթիվ նախաձեռնված քրեական վարույթի շրջանակում։ Ճշտող հարցին՝ արդյո՞ք դեպքը կապված է ռեստորանի սեփականատերերի հետ, խոսնակը բացասական պատասխան տվեց։ Ռեստորանի աշխատակիցներից մեկն էլ փոխանցեց, որ առայժմ հայտնի չէ, թե երբ է գործունեությունը վերսկսվելու։ Այն փակ է արդեն երեք օր։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝