Հայաստան-Սփյուռք կապը ամրապնդվում է նաեւ հումորով

Դեռևս 90-ականներից սկսած, հումորը հայրենիքի և սփյուռքի միջև կապող օղակ է հանդիսացել, երբեմն նաև շատ ակտիվ նպաստել հայապահպանման գործընթացին։ Գաղտնիք չէ, որ արտերկրում ապրող մեր հայրենակիցների երրորդ, արդեն նաև չորրոդ սերնդի ներկայացուցիչների մոտ, հասկանալի պատճառով հայերեն խոսելու և հայերեն մտածելու դժվարություններ կան։ Հումորիստ-դերասանների կողմից հնչող արտահայտությունները, սրամիտ կատակները, արտերկրում նոստալգիկ (կարոտաբաղձ) ժպիտով վերհիշելով և արտաբերելով, մեր հայրենակիցները` հայերեն ուրախանալով, հայրենիքից իրենց շատ կտրված չեն համարում։

Այսօր էլ կան այդպիսի սիրված կատարողներ, որոնք բացի ֆիլմերում և շոուներում հանդես գալուց, իրենց մոնոներկայացումներով են պահում կենդանի շփումը մեր արտերկրում բնակվող հայրենակիցների հետ։ Նրանցից ամենակարկառուն ներկայացուցիչը ՌաՖայել Երանոսյանն է, ով իր «Թրաֆիք», «Էվոլյուցիա» և «Փահլևան» մոնոներկայացումներով բազմիցս հանդես է գալիս Եվրոպայում, Ռուսաստանում և ԱՄՆ-ում։

Այս ներկայացումները հանդիսատեսի մոտ առաջացնում են և՛ ուրախ, և՛ կարոտաբաղձ հույզեր։ Ռաֆայել Երանոսյանի և նրա գլխավոր սցենարիստ Արմեն Վարդանյանի ջանքերի շնորհիվ աշխարհի բոլոր ծայրերում հանդիսատեսը ծափահարում և ծիծաղում է նույն ոգևորությամբ, ինչ Հայաստանում։ Հատկապես «Փահլևան» մոնոներկայացումը՝ 2024 թվականին ԱՄՆ-ում երեք անգամ Քալիֆորնիայում և մեկ անգամ Լաս Վեգասում, սոլդ-աութ անելուից հետո, կրկին ներկայացնելու հրավեր ստացավ նոյեմբերին ամսին՝ ԱՄՆ-ում:  

«Փահլևան»-ը լեփ-լեցուն դահլիճներով հաղթարշավ է ունեցել նաև Եվրոպայում, Իսպանիայում, Ֆրանսիայում, Հոլանդիայում, Բելգիայում և Գերմանիայում։ Նույնը կարելի է ասել «Թրաֆիք» և «Էվոլյուցիա» մոնոներկայացումների մասին։ Էվոլյուցիան լեփ-լեցուն դահլիճներ է ապահովել և՛ Սակրամենտոյում, և՛ Նյու Ջերսիում։ Այստեղ եւս մեկ անգամ համոզվում ենք, որ հումորը օգնում է մեզ իռացիոնալը տեսնել այնտեղ, ինչը թվում է ռացիոնալ և աննշան, և, իհարկե, այնտեղ, ինչը թվում է նշանակալի: Թերեւս մենք բոլորս հումորի միջոցով ավելի հեշտ կարող ենք դիմանալ բախտի անակնկալներին։

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝