Google-ը պատրաստվում է միավորել Android-ը և ChromeOS-ը՝ ստեղծելով միասնական օպերացիոն համակարգ

Google-ը հաստատել է իր երկարաժամկետ ռազմավարական նպատակներից մեկը՝ Android-ի և ChromeOS-ի միավորումը մեկ հարթակի ներքո։ Այս կարևոր նորությունը հայտարարվել է TechRadar-ին տված հարցազրույցում, որտեղ Google-ի Android էկոհամակարգի նախագահ Սամիր Սամատը պատմել է, որ ընկերությունը ակտիվ աշխատում է երկու օպերացիոն համակարգերը միավորելու ուղղությամբ։ Սամատը հետաքրքրվել է՝ ինչպես է TechRadar-ի լրագրող Լենս Ուլանոֆը կառավարում իր Apple սարքավորումները՝ ներառյալ MacBook-ը, iPhone-ը և Apple Watch-ը, քանի որ Google-ը նախատեսում է ChromeOS-ը և Android-ը դարձնել մեկ միասնական հարթակ և իրեն հետաքրքրում է՝ ինչպես են մարդիկ այսօր օգտագործում նոթբուքերն ու ինչի են հասնում դրանց միջոցով։

Այս քայլը տրամաբանական է Google-ի համար, քանի որ այն վաղուց է փորձում իր էկոհամակարգում գտնվող սարքավորումները՝ ներառյալ երրորդ կողմի արտադրանքները, աշխատեցնել միմյանց հետ համահունչ և ինտեգրված։ Apple-ը վաղուց ապահովում է իր սարքավորումների սահուն համատեղ աշխատանքը, իսկ Google-ը այժմ շարժվում է նման ուղղությամբ՝ իր տարբեր համակարգերը դարձնելով մեկ ամբողջականություն։ Թեև գուցե ավելի տրամաբանական լիներ, որ այդ միավորումը կատարվեր դեռևս սկզբում, սակայն այսօր ևս ուշ չէ նման քայլ անելու համար։ Այս միավորման առաջին նշանները ակնկալվում է տեսնել առաջիկա ամիսներին՝ երբ շուկա կհասնեն Android XR սարքերը։

Google-ը վերջին տարիներին արդեն նախանշել է այս անցման ուղին։ Անցյալ տարի ընկերությունը հայտարարեց, որ ChromeOS-ը աստիճանաբար կսկսի հիմնվել այն տեխնոլոգիաների վրա, որոնք արդեն օգտագործվում են Android-ում։ Բացի այդ, ChromeOS-ը վաղուց արդեն կարողանում է գործարկել Android հավելվածներ, որոնցից շատերն ունեն նաև աշխատասեղանային ռեժիմ։ Android 16-ը նույնպես նախատեսում է ներառել նմանատիպ ֆունկցիոնալություն՝ հիշեցնող Samsung DeX-ի ինտերֆեյսը։

Միավորված օպերացիոն համակարգը մի շարք առավելություններ կտա ինչպես օգտագործողներին, այնպես էլ ծրագրավորողներին։ Օգտատերերը կստանան համահունչ աշխատանք սարքերի միջև, մեկաձև միջավայր ու բարդությունների նվազում տարբեր պլատֆորմների միջև աշխատելիս։ Ծրագրավորողները կկարողանան ստեղծել հավելվածներ մեկ հարթակի համար, առանց անհանգստանալու երկու տարբեր համակարգերի տարբերակների համար անհատապես պատրաստվելու մասին։ Դա նաև կուժեղացնի Google-ի մրցունակությունը Apple-ի դեմ՝ որը վաղուց է ապահովում իր macOS-ի, iOS-ի և iPadOS-ի սինխրոն աշխատանքը։

Առայժմ պաշտոնական թողարկման օր չկա նշված, սակայն ակնկալվում է, որ առաջին փոփոխությունները կերևան մինչև 2025 թվականի վերջը՝ հնարավոր է սկսվելով նոր Android 16 տարբերակով և շարունակելով արդեն համատեղ արտադրանքներով 2026-ին։ Google-ի այս ռազմավարությունը ոչ միայն տեխնիկական միավորում է, այլ նաև խորը քայլ է ուղղված իր համակարգի լիարժեքության և կայունության բարձրացմանը տեխնոլոգիական մրցակցության մեջ։

Արսեն Լևոնյան

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝