ՆՈՐ ԿՅԱՆՔ ԳՅՈՒՂՈՒՄ ԿԱՅԱՑԵԼ Է «7 ՔԱՐ» ԲԱԿԱՅԻՆ ԽԱՂԵՐԻ ՓԱՌԱՏՈՆԸ

Iravunk. com -ի Շիրակի մարզի թղթակիցը Արթիկ համայնքի Նոր Կյանք գյուղում էր։ Այստեղ տիրում էր տոնական տրամադրություն, կայացավ «7 քար» բակային խաղերի փառատոնը։ Հայկական տարազներով պարախմբերի ելույթների, ազգային, աշուղական, ազգագրական գեղեցիկ երաժշտական կատարումների, ավանդական ուտեստների, արհեստի ու արվեստի ստեղծագործությունների ցուցադրությունը հարազատ ու մտերմիկ մթնոլորտ էր ստեղծել, ուրախ տրամադրություն։

Միջոցառմանը ներկա էին Արթիկ համայնքի ղեկավարի տեղակալ Վարդան Մակեյանը, համայնքապետարանի աշխատակիցներ, գյուղերի վարչական ղեկավարներ։ Ներկաներին ողջունեցին Արթիկի համայնքապետարանի աշխատակազմի քարտուղար Արա Սուքիասյանը և Lead 4 Shirak ծրագրի ղեկավար Հուսիկ Սարգսյանը։ Արա Սուքիասյանը իր խոսքում կարևորեց Արթիկի համայնքապետարանի, «Ավստրիական զարգացման գործակալության», «Արագած հովիտ» տեղական ակտիվ խմբի և Lead 4 Shirak ծրագրի համագործակցությունը փառատոնի կազմակերպման ու անցկացման գործում։ Փառատոնը և մշակութային այլ ձեռնարկները նպաստում են համայնքի զարգացմանն ու աշխուժացմանը։ Նոր Կյանք գյուղում տիրող ուրախ տրամադրությունը անտարբեր չէր թողել նաև զբոսաշրջիկներին։ Նրանք էլ փորձում էին մասնակցել խաղերին, զգալ հայկական ավանդական գյուղական միջավայրի համն ու հոտը։ Իսկ տեղաբնակների ոգևորությունը շատ մեծ էր։ Խաղում էին մեծ ու փոքր, վերհիշում մանկության տարիներից մոռացված քարային «7 քար», «Սալմա քար», «Կլաս», «Քարգլոր», «Նշանբռնոցի» խաղերն ու բակային այլ խաղեր։ Ներկաները հաճույքով շփվեցին «Խաբուխազ» կանանց ակումբի տատիկների հետ, նարդի ու շախմատ խաղացին տեղացի պապիկների հետ, վայելեցին տոնական օրը դիջեյ Stavros - ի երաժշտության ներքո, համտեսեցին գյուղական համեղ սնունդ, խմիչքներ, հայկական ավանդական թոնրի լավաշն ու բոքոնը, թափթափան, կարասում հորած կանաչ պանիրը, հայկական ավանդական խորիզով գաթան, թանը։ Այս գեղեցիկ փառատոնի հյուրերն էին «Նավակատիք» կրթամշակութային կազմակերպությունը, «Մենք» և «Հրայրք» ազգային պարի խմբերը։ Մասնակիցներ կային նաև հարևան գյուղերից։ Դիզայներ ԵՎԱ ԱՎԵՏԻՍՅԱՆԸ եկել էր Հայրենյաց գյուղից սեղանները ձևավորելու նպատակով։

«Ինձ հետ բերել եմ հայկական ավանդական կահ - կարասի, կավե կճուճներ, որոնց մեջ պանիր ենք հորում, /հիմա ցավոք քչերն են անում /, փայտե գդալներ, շերեփներ, թոնրի լավաշ թխելու պարագաներ, կարպետներ, ջրամաններ, տաշտեր, արիշտայի պարագաներ, ցորեն, ձավար ծեծելու երկանք։ Ներկայացնում ենք հին իրեր, որոնցից շատերը մեր օրերում հայտնվել են մոռացության եզրին։ Ցուցադրում ենք, որ նոր սերունդը ևս իմանա, կիրառի կենցաղում։

Շատ ուրախալի է, որ այսօր այստեղ բազմաթիվ զբոսաշրջիկներ կային և մեծ հիացմունքով էին նայում ներկայացված իրերը, հետաքրքրվում էին դրանց նշանակությամբ։ Նույնիսկ գնեցին իմ ձեռքով պատրաստած որոշ իրեր գեղեցիկ ուլունքներ, վզնոցներ ու ասեղնագործ աշխատանքներ։ Շատ լավ է, որ մեր մարզն էլ անմասն չի մնում և մեր մոտ էլ են անցկացվում նմանատիպ միջոցառումներ»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝