Սեր, որ մոխրացավ 10 օրում. ֆուտբոլային աշխարհը սգում է Անդրե Ժոտայի մահը

Ֆուտբոլային աշխարհը սգում է «Լիվերպուլի» եւ Պորտուգալիայի ազգային հավաքականի հարձակվող 28-ամյա ԴԻՈԳՈՒ ԺՈՏԱՅԻ մահը: Իսպանիայի Սամորայի գավառում տեղի ունեցած սարսափելի ավտովթարի հետեւանքով ընդհատվեց նրա կյանքի ճանապարհը։ Եվ ոչ միայն նրա, այլեւ հարազատ եղբոր՝ ԱՆԴՐԵ ԺՈՏԱՅԻ, ով 26 տարեկան էր եւ հանդես էր գալիս «Պենաֆիել» ակումբում։

Մեքենան, որի մեջ եղել են եղբայրները, A-52 ավտոմայրուղու 65-րդ կիլոմետրում դուրս է եկել երթեւեկելի հատվածից, բախվել եւ բոցավառվել։ Ականատեսների խոսքերով՝ մեքենան վայրկյանների ընթացքում վերածվել է կրակե գերեզմանի։ Հրդեհը տարածվել է նաեւ հարակից տարածքներում։ Շտապօգնությունը եւ հրշեջները ժամանել են արագ, բայց արդեն ուշ էր… Ժոտա եղբայրները մահացել էին տեղում։ Երկու մարմին, բայց մի ճակատագիր։

Այս ողբերգությունը ցնցել է ինչպես Պորտուգալիան, այնպես էլ ամբողջ ֆուտբոլային աշխարհը։ Հուղարկավորությունը տեղի է ունեցել Լիսաբոնում, որտեղ սգացող հարազատների, երկրպագուների ու համախոհների բազմություն էր հավաքվել։

Ներկաներից շատերին տպավորել է հատկապես, թե ինչպես են ողբում իրենց ընկերոջ մահը Դիոգու Ժոտայի երկարամյա թիմակիցները՝ Վիրջիլ վան Դեյքը, Էնդի Ռոբերտսոնը, ինչպես նաեւ Ռուբեն Նեւեշը, ով ժամանել էր անմիջապես Կատարում անցկացվող Աշխարհի ակումբային առաջնության խաղից հետո։ Վան Դեյքն ու Ռոբերտսոնը զույգ եղբայրների համար հատուկ պատվերով պատրաստված ծաղկեպսակներ էին բերել՝ նրանց խաղային համարներով։ Ռուբեն Նեւեշը անձամբ է տարել Դիոգուի դագաղը՝ արտասվախառն աչքերով։

Բայց Դիոգու Ժոտայի մահը միայն ֆուտբոլային աշխարհի կորուստը չէ։ Դա կիսատ մնացած սիրո պատմություն է։ Ժոտան ու Քատրինան սիրահարվել էին դեռ պատանի տարիներին՝ 16-ում։ Միասին անցել էին 12 տարի, մեծացրել երեք երեխա։ Եվ երբ, վերջապես, որոշեցին ամուսնանալ՝ այդ օրը դարձավ սկսված հեքիաթի վերջին էջը։ Միայն 10 օր էր անցել հարսանիքից, երբ Քատրինան, նորահարս զգեստից դեռ չկտրված, կանգնած էր ամուսնու դագաղի առաջ՝ երեք փոքրիկների ձեռքը բռնած։

 «Սա պետք է լիներ մեր կյանքի երջանիկ էջը, բայց այն դարձավ մղձավանջ», – ասել է Դիոգուի մոտ ընկերներից մեկը։

«Ես դեռ չեմ հավատում, որ դու այլեւս չկաս, Դիոգու», – գրել է Կրիշտիանու Ռոնալդուն. «Մենք միասին կիսեցինք խաղադաշտը, պայքարը, երազանքները։ Դու ինձ համար միայն խաղընկեր չէիր՝ դու ընտանիք էիր։ Հանգչիր խաղաղությամբ, եղբայրս»։

Պորտուգալիայի ֆուտբոլային ֆեդերացիան հայտարարել է սգո շաբաթ՝ բոլոր ազգային առաջնությունների հանդիպումներից առաջ հայտարարվել է մեկ րոպե լռություն։ «Լիվերպուլի» գլխավոր մարզիչ Յուրգեն Կլոպը նշել է․ «Դիոգուն մեր ընտանիքի սիրտն էր։ Նրա կորուստը բաց թողած գոլ չէ. դա բաց թողած հոգի է»։

Ժոտա եղբայրների մահը հիշեցում է բոլորիս՝ ապրել եւ գնահատել յուրաքանչյուր վայրկյանը։ Դիոգու Ժոտան ու Անդրե Ժոտան հեռացան աշխարհից շատ վաղ, սակայն նրանց հիշատակը կմնա հավերժ՝ նրանց խաղերի, ժպիտների ու թողած սիրո մեջ։ Թող նրանց հոգիները խաղաղություն գտնեն։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝