ՀՈՎՀԱՆՆԵՍ ԲԱՉԿՈՎԸ ՆՈԿԱՈՒՏՈՎ ՀԱՂԹԱՆԱԿ ՏՈՆԵՑ ԹՈՒՐՔԻԱՅՈՒՄ

Անվանի բռնցքամարտիկ, Տոկիոյի ՕԽ բրոնզե մեդալակիր, Եվրոպայի քառակի չեմպիոն, Աշխարհի քառակի բրոնզե մեդալակիր, Գյումրեցի ՀՈՎՀԱՆՆԵՍ ԲԱՉԿՈՎԸ, քիչ առաջ, 8֊րդ հաղթանակը տարավ պրոֆեսիոնալ ռինգում։ Թուրքիայի Ստամբուլ քաղաքում անցկացվող IBA Pro - 7 Champions Night մրցաշարում 63,5 կգ քաշային կարգում Բաչկովը մենամարտեց հարավաֆրիկացի Խոլիսանի Նդոնգենի հետ ու հաղթանակի հասավ 9֊րդ ռաունդում, մրցակցին նոկաուտի ենթարկելով։ ՕԽ բրոնզե մեդալակիրը նվաճեց IBA Pro չեմպիոնական գոտին։ Մենամարտի 9-րդ ռաունդում Բաչկովի հարվածից հակառակորդը ծնկի իջավ։ Այդ ընթացքում մրցավարը ցանկանում էր հաշիվ բացել, հարավաֆրիկացու անկյունն անմիջապես սպիտակ սրբիչ նետեց ռինգ։

«Շատ ուրախ եմ, որ կարողացա հաղթանակի հասնել և նվաճել այս չեմպիոնական գոտին։ Շնորհակալ եմ բոլորին, ով եկել էր հետևելու իմ մենամարտին, նաև նրանց ովքեր չեն կարողացել ժամանել Թուրքիա», փայլուն հաղթանակից հետո նշեց Հովհաննես Բաչկովը։ Նշենք, որ մենամարտի 2 ռաունդներում Բաչկովը պաշտպանողական մենամարտ էր վարում, աշխատելով ռինգի կենտրոնից։ Այս ռաունդներում մրցակցի հարվածները հասնում էին նպատակին։ Երրորդ ռաունդում հայ կաշվե ձեռնոցի մարտիկն ակտիվացավ ու իրար հաջորդող հարվածաշարերով առավելություն ձեռք բերեց մրցակցի հանդեպ։ IBA Pro չեմպիոնական գոտին ստանալուց հետո ռինգ բարձրացավ նաև Հայաստանի բռնցքամարտի ֆեդերացիայի նախագահ Հովհաննես Համբարձումյանը։

Բաչկովը շնորհակալություն հայտնեց նաև ֆեդերացիայի նախագահին։ Բաչկովի մենամարտին Ստամբուլի մարզադահլիճում հետևում էր նաև IBA նախագահ Ումար Կրեմլյովը։

Iravunk. com - ը, շնորհավորում է հայ մարզիկին, մաղթում նորանոր հաղթանակներ։

ՀՈՎՀԱՆՆԵՍ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝