Թե բա` քաղաքային իշխանությո՜ւն, բարեփոխումնե՜ր, ֆլան-ֆստա՜ն…

Թե բա՝ քաղաքային տրանսպորտի բարելավում. նման ձեւակերպումներ անողները տեսե՞լ են` ինչ է կատարվում քաղաքում, հատկապես առավոտյան եւ երեկոյան՝ աշխատանքային ժամի ավարտին: Տեսե՞լ են քաղաքային տրանսպորտում մարդկաց քանակը՝ կրկին իրար դեմքի շնչելով: Հիմա էլ ավտոբուսների գծեր են քաշել, ներկել ու առաջ բերել: Դա կհամարվեր նորմալ այն դեպքում, երբ ճանապարհները ունենային չորս գիծ ու նոր մեկը հատուկ տրամադրեին տրանսպորտին, սակայն երբ կա ընդամենը երեք գիծ, որից մեկը փակվում է՝ կես ժամը մեկ եկող ավտոբուսի համար, իսկ այն երկու գծերը աշխատում են 10 բալանոց խցանման տակ, դա առնվազն անտրամաբանական է: Էլ չխոսենք վճարման ձախողված համակարգից, որքա՞ն կարելի է նույնն ասել:

Հարց է ծագում՝ Երեւանի քաղաքապետ Տիգրան Ավինյանը կամ քաղաքապետարանի աշխատակիցները, տո ինչու ոչ, նաեւ ավագանու անդամները չե՞ն օգտվում տրանսպորտից: Ասենք թե՝ ոչ, բայց գոնե երթեւեկում են չէ՞: Հետեւաբար, չեն տեսնում խցանումների աստիճանը, չեն հասկանո՞ւմ, որ այլեւս նման կերպ՝ քաղաքը պարալիզացնելով չեն կարող երկար շարունակել: Չնայած լավ էլ շարունակում են: Ինչից է ազդվում ներկա իշխանությունն ու ընդդիմությունը, որ մի հատ էլ խցանումներից ազդվի:

Գնանք առաջ: Հասկանալի է չէ՞, որ քաղաքային տրանսպորտ նստելու համար պետք է լինել հերոս, դե հարկատուի նման: Այդ իսկ պատճառով շատերը նախընտրում են տաքսիներով երթեւեկել, եւ դա ունի տարբեր պատճառներ:

Իսկ ինչ է անում տաքսին, այ այստեղ սկսվում է բոլորովին ուրիշ կինո: «Յանդեքսը», կորցնելով նամուս ու թասիբ, պիկ ժամերին իր մինիմալ գները բարձրացնում է ընդհուպ 1600 դրամի: Ու կապ չունեն արդեն եղանակային պայմանները՝ գները բարձրանում են աննպատակ կամ գուցե` կապված «Յանդեքսի» տիրոջ տրամադրությունից: Այս բարձիթողի վիճակի համար բացարձակապես պատասխանատվություն չի կրում ոչ ոք, ոչ մի կառույց: Չկա վերահսկողություն, չկա պատասխանատվություն: Էլ չենք խոսում վարորդների որակից, որն իսկապես վերանայելու կարիք ունի եւ հրատապ: «Յանդեքսի» վարորդ կարող է դառնալ 18 տարեկանը բոլորած պատանուց սկսած մինչեւ ամենավերջին հանցագործն ու հոգեկան խնդիր ունեցող անձը՝ անկախ ազգությունից: Ոչ մի տեսակի զննում չանցած մեկը կարող է մեքենա վարձել եւ տեղափոխել կին, երեխա, տարեց...

Վերադառնանք գներին. վերջին օրերին «Յանդեքս» տաքսի ծառայության գները հասնում են ոսկու գներին: Օրինակ` Արշակունյացից Մասիվ ուղեվարձը կարող է կազմել 3000 դրամ` 1300-ի փոխարեն, կամ Չարբախից Բաղրամյան՝ 2800 դրամ՝ այն դեպքում, որ դա իրականում կազմում է 1400 դրամ: Այս վիճակից օգտվելով` մնացած տաքսու վարորդները, որոնք աշխատում են ոչ «Յանդեքսի» տակ, ավելի բարձր են սահմանում ուղեվճարները, ու տիրում է անվերահսկելի քաոս՝ A կետից B կետ հասնելու համար:

Նկատենք, որ դեռ ամառային արձակուրդներ են, բա ի՞նչ է լինելու, երբ գա սեպտեմբերը, Боже упаси...Խիղճները կորցրած, ով ինչպես հասցնում «քերում» է ժողովրդին եւ չի կրում պատասխանատվություն: Քաղաքապետարանում նստած ավագանու անդամները լոլոներ կարդալու փոխարեն՝ լավ կանեն ուշադրություն դարձնեն խցանումներին, տաքսիների գներին, ավտոբուսների միջի մարդկանց քանակին, վճարման համակարգին ու առհասարակ՝ հոգնած կլինեք, տղերք, ահագին աշխատեցիք…

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝