Հերիք չէ՞ այս ազգի արյունը խմեք. Խաչիկ Մանուկյան

«Իրավունք»-ը զրուցել է 44-օրյա պատերազմում զոհված Վաչագան Մանուկյանի հոր՝ բանաստեղծ ԽԱՉԻԿ ՄԱՆՈՒԿՅԱՆԻ հետ, որը հարյուրավոր քաղաքացիների հետ եկել էր դատարանի մոտ՝ իր աջակցությունը հայտնելու «Սրբազան պայքար» շարժման առաջնորդ Բագրատ արքեպիսկոպոս Գալստանյանին եւ մյուս ձերբակալված ու կալանավորված անձանց:

— Պարոն Մանուկյան, ինչպե՞ս կմեկնաբանեք վերջին օրերին տեղի ունեցած աղմկոտ ձերբակալությունները:

— Մեր երկրի մեծագույն զավակներից մեկին են կալանավորում չարքապատկանները: Կլյաուզնիկ թերթի խմբագիրը ազնվազարմ հայորդուն կալանավորում է: Այսինքն՝ ցույց է տալիս, որ նա օտարի շահեր սպասարկողն է: Իսկ սրբազանն իր ամբողջ կյանքը նվիրել է իր ազգին, իր ժողովրդին, հայրենիքին եւ մինչ հիմա ծառայում է հայրենիքի համար ու թույլ չի տալիս, որ չարքապատկանները իրենց գործը անեն: Վստահ եմ, որ սա կդառնա նաեւ այն սկիզբը մեծ զարթոնքի, որը համահայկական բնույթ է կրելու եւ տապալելու է բոլոր չարքապատկաններին, կանգնեցնելու է արդարադատության առաջ: Ես շատերից եմ լսում, որ մահապատիժներ են ուզում, մահապատիժը նրանց համար երանություն պիտի լինի: Նրանք պետք է պատասխան տան ամեն կատարած ոճիրի համար՝ սկսած տղաների կյանքը, արյունը խմելուց եւ մինչ հիմա հողերը հանձնելը: Ո՛չ սրբություն ունեն, ո՛չ ազգային պատկանելիություն, ո՛չ իղձ, ո՛չ երազանք: Եվ չարքապատկաններից շատերը հենց դա էլ հայտարարում են, որ իրենք չունեն ազգային իղձ: Բա եկել ի՞նչ եք անում, արա՛, արյո՞ւն եք խմում: Հերիք չէ՞ այս ազգի արյունը խմեք: Լինելո՛ւ է հաղթանակ՝ համաժողովրդական, հայկական հաղթանակ լինելո՛ւ է:

— Տարածում են տեսանյութեր՝ զենք- զինամթերքի, «հեղաշրջման պլանի», ի՞նչ կասեք այս մասին:

— Դե, մենք սովոր ենք, որ այս շառլատանները միայն դա կարող են անել: Այս ստախոսները բա էլ ի՞նչ տարածեն: Մենք ապրում ենք ստի կայսրության մեջ, եւ այդ կայսրությունը շնչավորում են մարդիկ՝ նրանք, ովքեր տարածում են դրանք, խոսում են այդ մասին: Իհարկե, հասկանալի է, որ դա իրենց ոճն է, եւ այդ ոճով նրանք կարողանում են մարդկանց, այդ զոմբիական համայնքներին կաշառել եւ ցույց տալ, թե՝ տեսեք-տեսեք, մենք հանցավոր ենք բռնում՝ այն դեպքում, որ մեր ժողովրդի մեծագույն զավակներից մեկն է Բագրատ սրբազանը: Եթե մեր օրերից մի քանի անուններ են գնալու դեպի Հայոց պատմություն, մեկը լինելու է նրա անունը:

— Կալանավորվածների մեջ է նաեւ 44- օրյա պատերազմում զոհված Հակոբ Ռոստոմյանի հայրը՝ Արա Ռոստոմյանը…

— Գիտեք ինչ, նրանք ծաղրում են դրանով, որ մեր զավակները գնացին, կյանք տվեցին հայրենիքի համար, իսկ նրանք ուռճանում են, վզներն են հաստացնում: Հասկանո՞ւմ եք, իրենք իսկապես պատկանելիություն չունեն: Իրենք ընդամենը Էրդողանի, Ալիեւի կամակատարներն են: Այսչափ նվաստացած վիճակով ժողովուրդն ապրում է: Այդ արբեցող գոյանքին ուղարկում են բանակցելու: Ի՞նչ է բանակցում: Պարտության սիմվոլներն ի՞նչ են բանակցում: Իհարկե, պարտության մասին, հանձնումերի մասին պիտի խոսեն: Հայրենիքի տարածքները օտարելու մասին պիտի խոսեն: Հերոսի անուն կարո՞ղ են սրանք տալ: Իրենց առաջին հերոսը հարկ վճարողն է, որի հարկերն էլ տանում են միլիոններով ինչ-որ կասկածելի երգիչների են նվիրում: Հետո էլ կասեն՝ հարկ տվեք: Տան, ի՞նչ անեք, արա՛, մսխում, փոշիացնում եք ամեն բան: Բերել այդքան ոստիկաններ էին շարել դատարանի առաջ, որ ի՞նչ: Ոստիկանապետություն եք սարքում ո՞ւմ դեմ, հանուն ինչի՞:

— Ամեն բան սկսվեց եկեղեցու դեմ արշավից, նույնիսկ Փաշինյանը գրառում էր կատարել, որ խումբ է ձեւավորվելու ՝վեհարանը ազատագրելու համար: Ի՞նչ եք կարծում՝ նա կգնա՞ նման քայլի:

— Սա աննախադեպ ծաղր է: Սա վերջն է, երբ մարդ այլեւս անելիք չունի: Նա բազում անգամ հուշում է, որ ինքը որեւէ կերպ չի սպասարկում ժողովրդին, երկրին: Գուցե սպասարկում է, բայց ոչ մեր երկրին: Նա գնում է, իրեն խորհուրդ են տալիս, եւ վերադառնում է: Նա կարողանում է հաջողությամբ իրագործել միայն այն, ինչը խոստացել է մեզ համար թշնամի, իր համար բարեկիրթ բարեկամներին: Բայց մենք պետք է ցույց տանք մեր հավաքների օգտակար գործողության արդյունքը, որտեղ կկարողանանք հաղթության հասնել, մեր համազգային զարթոնքը կայացնել եւ, ի վերջո, դուրս շպրտել չարքապատկաններին ու կանգնեցնել արդարադատության առաջ:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝