Կներեք, բայց սա «աբիժնիկություն» է. Դավիթ Ամալյան

Ի պաշտպանություն Հայ Առաքելական Սուրբ եկեղեցու արված հայտարարությունից հետո՝ հայտնի գործարար Սամվել Կարապետյանը նախ ձերբակալվեց, ապա Երեւանի ընդհանուր իրավասության քրեական դատարանը որոշում կայացրեց նրա նկատմամբ՝ որպես խափանման միջոց կիրառել կալանքը՝ երկու ամսով։ Այս մասին «Իրավունք»-ը զրուցել է 44- օրյա պատերազմում զոհված Վարդան Ամալյանի հոր՝ ՀՀ վաստակավոր արտիստ, երգիչ, երգահան ԴԱՎԻԹ ԱՄԱԼՅԱՆԻ հետ:

— Վերջապես ի՞նչ է կատարվում՝ երկրի իշխանությունը վիրավորում է եկեղեցուն, անազատության ենթարկում անհատների ու բարերարների:

— Այն, ինչ տեղի է ունենում, պատճառն առաջացել է 1975 թվականի հունիսի մեկին: Բավական չի այդ «առաջացումը» աճել է, մի հատ էլ հասարակության «ինտելեկտուալ» մեծամասնության «շնորհիվ» եկել է իշխանության: Հետեւապես, ինչ տեղի է ունենում՝ չի զարմացնում՝ թե՛ պատերազմը, թե՛ պատերազմի բերած պարտությունը եւ զոհերի քանակը: Ցավոք սրտի, ինքս մեծ կորուստ ունեմ… Կներեք, բայց հայերեն այդ բառը թարգմանություն չունի, ստիպված ռուսերեն պետք է ասեմ՝ «աբիժնիկություն» է սա: Մենք ավելի խորքային ենք նայում՝ արտաքին ճնշում եւ այլն: Չէ՛, եթե կա արտաքին ճնշում, ապա թշնամու կողմից է, իսկ նա թշնամու լծի տակ է միայն նրա համար, որովհետեւ «աբիժնիկ» է, քանի որ թշնամուն չեն սիրում այն մարդիկ, ում ինքն էլ չի սիրում:

— Դուք դատարանի առաջ էիք՝ ի աջակցություն Սամվել Կարապետյանի: Ինչո՞վ է բացատրվում այն, որ մշակութային գործիչներից սակավաթիվ մարդիկ են նման դեպքերում արձագանքում: Սա ինչպե՞ս կբացատրեք:

— Գալիս են մարդիկ, պարզապես չեն նկատվում: Դատարանի առաջ տեսա նաեւ Ռազմիկ Ամյանին: Իհարկե, ես շատ կցանկանամ, որ բոլորը գան: Կոնկրետ Մրոն՝ Արսեն Գրիգորյանը, անձնական խնդիր ունի, այս օրերին հայրը մահացավ, չկարողացավ գալ: Շատ մարդկանց գիտեմ, ովքեր համախոհ են, մեր կողմն են, պարզապես չեն կարողանում գալ՝ թե՛ աշխատանքի բերումով, թե՛ այլ պատճառաբանությամբ: Մեղադրել մարդկանց չեմ կարող:

— Նույն ինքը՝ Սամվել Կարապետյանը, շատերին է աջակցել տարբեր հարցերով, բայց, ցավոք, այս պահին իր կողքին չեն…

— Ես այդ մարդկանց շարքին չեմ պատկանում, եւ դրա համար չէ, որ այստեղ եմ: Սամվել Կարապետյանին, որպես գործարար, անհատ, մարդ, շատ հարգում եւ ընդունում եմ, բայց այս պահին խնդիրն ավելի քան խորքային է եւ ցավոտ: Սամվել Կարապետյանը դարձել է թիրախ` եկեղեցու պայքարի ճանապարհին:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝