ՊՀԹ-ն միշտ լի է անակնկալներով. Կոզմանովը՝ Պատանի հանդիսատեսում առկա իրավիճակի մասին

Պատանի հանդիսատեսի թատրոնում ուղիղ մեկ ամիս առաջ սկանդալ բարձրացավ՝ կապված տնօրեն Էմին Թորոսյանի պաշտոնից ազատման հետ։ Թորոսյանը հայտարարեց, որ աշխատանքից հեռացվել է քաղաքապետարանի մշակույթի վարչության պետ Գոշ Սարգսյանի՝ «հիմնազուրկ» զեկուցագրի հիման վրա։ Թատրոնի ստեղծագործական կազմը հանդես եկավ բողոքով, իսկ քաղաքապետարանը արձագանքեց՝ հայտարարելով, որ թատրոնի աշխատակազմին կներկայացվի տնօրենի ժամանակավոր պաշտոնակատար Գոռ Մարգարյանը՝ Աշտարակի դրամատիկական թատրոնի գեղարվեստական ղեկավարը: Հունիսի 5-ին տեղի է ունեցել հանդիպում փոխքաղաքապետ Լեւոն Հովհաննիսյանի հետ, որի ընթացքում Մարգարյանն արդեն ներկայացվել է անձնակազմին։ Այս մասին «Իրավունք»-ը զրուցեց ՊՀԹ դերասան ԿՈՆՍՏԱՆՏԻՆ ԿՈԶՄԱՆՈՎԻ հետ:

— Համակերպվե՞լ է Պատանի հանդիսատեսի թատրոնի ստեղծագործական կազմը նոր տնօրենի ժամանակավոր պաշտոնակատար Գոռ Մարգարյանի նշանակման հետ: Ինչպե՞ս եք դիմավորել նրան:

— Թատրոնի ստեղծագործական կազմն իր գործունեության հիմքում միշտ դրել է արվեստի նկատմամբ նվիրվածությունը եւ պատասխանատվությունն իր հանդիսատեսի հանդեպ։ Տնօրենի փոփոխությունն այլեւս իրականություն է, եւ անձնակազմի համակերպվել-չհամակերպվելն այժմ ոչինչ չի կարող փոխել: Մենք դա ընդունում ենք որպես աշխատակարգային գործընթաց եւ պատրաստ ենք համագործակցել՝ հանուն թատրոնի կայուն զարգացման: Հունիսի 5-ին հանդիպում ենք ունեցել փոխքաղաքապետ Լեւոն Հովհաննիսյանի հետ: Անմիջական զրույց ենք ունեցել, մեր մի շարք հարցերի պատասխաններ ենք ստացել, խոսվել է թատրոնի հետագա ծրագրերի, ներդրումների, աշխատավարձերի բարձրացման ու նոր ներկայացումների ֆինանսավորման մասին: Հենց այդ ժամանակ էլ ներկայացվել է ՊՀԹ տնօրենի ժ/պ Գոռ Մարգարյանը:

— Թատրոնի շատ դերասաններ շաբաթներ առաջ բավական կտրուկ հայտարարություններով հանդես եկան, պարզաբանումներ էին պահանջում քաղաքապետարանից՝ նախկին տնօրեն Էմին Թորոսյանին հեռացնելու հետ կապված: Տրվե՞լ են սպառիչ պատասխաններ:

— Հունիսի 5-ի հանդիպման ժամանակ եւս դերասանները պարզաբանում պահանջեցին արդեն նախկին տնօրենի հեռացման մասին: Փոխքաղաքապետ Լեւոն Հովհաննիսյանը առաջարկեց հանդիպում կազմակերպել Քաղաքապետարանում, որին ներկա կլինի Մշակույթի եւ տուրիզմի վարչության պետը: Հույս ունենք, որ հետագա հաղորդակցությունը կօգնի սպառիչ պատասխաններ ստանալ:

— Ի՞նչ մթնոլորտ է հիմա թատրոնում, կլինե՞ն մարդիկ, որոնք չեն ցանկանա աշխատել Գոռ Մարգարյանի հետ եւ կհեռանան:

— Թատրոնում այժմ հարաբերական անդորր է.... (ծիծաղում է, - հեղինակ): Բնական է, որ յուրաքանչյուր փոփոխություն կարող է տարբեր արձագանքներ առաջացնել անձնական մակարդակով: Չեմ կարող պատասխանել բոլորի փոխարեն, յուրաքանչյուրն ազատ է իր դիրքորոշումն արտահայտելու եւ որոշում կայացնելու մեջ:

— Ի վերջո, կարո՞ղ ենք ասել, որ Պատանի հանդիսատեսի թատրոնում ծագած խնդիրը, գտավ իր հանգուցալուծումը, քանի որ այլեւս պայքարելու, չլռելու կոչեր չկան, թե՞ դեռ սպասել նոր «անակնկալների»:

— Խնդրի վերջնական հանգուցալուծման համար կարեւոր է, որ բոլոր կողմերն ունենան պատրաստակամություն կառուցողական համագործակցության, պատրաստ լինեն անկեղծ երկխոսության: Ինչ վերաբերում է «անակնկալներին»՝ ՊՀԹ-ն միշտ լի է անակնկալներով, սակայն հույս ունենք, որ դրանք կլինեն բացառապես ստեղծագործական բնույթի։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝