Այստեղ են ասել՝ օձը տաքացնողին է կծում. ԶԱՐՄԱՆՔ

Պարզվում է՝ քաղաքական հիշողությունն արթնանում է այն ժամանակ, երբ կա դրա նպատակահարմարությունը: Քաղաքական մարտերի վետերան ՆԻԿՈԼ ՓԱՇԻՆՅԱՆԸ, ինչպես երեւում է, հիմա է միայն սկսել գիտակցել, թե ով էր իր երբեմնի առաջնորդը։ Ըստ նրա` Լեւոն Տեր-Պետրոսյանը Հայաստանի Հանրապետությունում ընտրությունների կեղծման պրակտիկայի հիմնադիրն է, եւ «նա, իհարկե, պիտի կանգնի իր նման ժողովրդատյաց կեղծարարի ու կեղծիքի կողքին»: Ահա այսպես է արձագանքել Փաշինյանը Հայաստանի Հանրապետության առաջին նախագահի այցին Մայր Աթոռ եւ Ամենայն հայոց կաթողիկոսին աջակություն հայտնելուն։ Բայց զավեշտն այն է, որ Նիկոլ Փաշինյանը Լեւոն Տեր-Պետրոսյանի ընտրակեղծարարության մասին չէր խոսում 2007-2008 թվականներին, երբ վարում էր նախագահի թեկնածու Տեր-Պետրոսյանի նախընտրական ու հետընտրական հանրահավաքները։ Հետագայում էլ՝ 2012 թվականին, նույն Տեր-Պետրոսյանի ցուցակով դարձավ Ազգային ժողովի պատգամավոր։ Այստեղ են ասել՝ օձը տաքացնողին է կծում:

Այս համատեքստում ոչ պակաս ուշագրավ էր Ազգային ժողովի նախագահ ԱԼԵՆ ՍԻՄՈՆՅԱՆԻ արձագանքը: Նա էլ Լեւոն Տեր-Պետրոսյանին մեղադրել է մարտի 1-ի չարաբաստիկ դեպքերի օրը տանից դուրս չգալու մեջ, երբ ժողովուրդը, իր անունը գոռալով, ինչպես Սիմոնյանն է բնութագրում, «գնդակահարվում էր»: Նա հիշեցնում է. «Երբ Երեւանի մայթերին հայի արյունն էր թափված, ասեցիր, որ ամենահանգիստ գիշերն ես ունեցել այս ընթացքում: Քեզ թվում է, որ մեկ է` ինչ էլ անես` քեզ հիշելու են որպես անկախության սիմվոլ եւ մեծարեն, բայց չարաչար սխալվում ես. ժամանակները փոխվել են, դու ամեն ինչ արեցիր, որ քեզ այլեւս չհիշեն կամ կհիշեն որպես անհաջող անցյալի փորձանք»: Փաստորեն, ստացվում է, որ այսքան տարի ՔՊ-ականներն էլ, որոնց մեծ մասը եղել է լեւոնական, հոգու խորքում միշտ ընդունել են, որ մարտի 1-ի դեպքերի մեջ իր մեղքի բաժինն ունի Տեր-Պետրոսյանը ու չեն արտահայտվել: Բայց սա չէ միայն զարմանալին, այլ այն, որ Սիմոնյանը Տեր-Պետրոսյանին ասում է. «Դու բարոյականության պարտության, անկախության ձախողման, քաղաքական անհաջողության, մարդկանց հույսի, սպասումների, ժողովրդավարության եւ բոլոր պարտությունների սիմվոլն ես»: Մի հարցնող լինի՝ բա Փաշինյան Նիկոլն ինչի՞ սիմվոլ է, Ալե՛ն:

Եվ ահա, ի հեճուկս իշխանական հակատերպետրոսյանատյաց հայտարարությունների, նույնքան զարմանալի տեսակետ է առաջ քաշում մեդիափորձագետ ՏԻԳՐԱՆ ՔՈՉԱՐՅԱՆԸ: «Իմ հասկանալով՝ Լեւոն Տեր-Պետրոսյանը «ռազվեդկի» էր գնացել Էջմիածին, ինչ-որ պետք էր իմացավ, ում որ պետք էր տեղեկացրեց: Ասեց` շարունակի գազ տալ: Նիկոլն էլ գազ տվեց, միաժամանակ` ծիպը մենք իրար հետ կապ չունենք: Իրար հետ ջերմ հարաբերություններ ունենալ, բայց հանրայնորեն իրար քրֆել, շատ հին ու արդեն բոլորի կողմից պալիտ եղած սխեմա է: Էջմիածնի որոշ սպասավորներին էլ խորհուրդ կտամ, Լեւոնի ասածներից չթուլանալ ու սխալ երազանքների մեջ չընկնել»: Ի՞նչ ասես, մեր օրերում ոչինչ բացառել պետք չէ, իսկ զարմանալի «զուգադիպություններ», համաձայնեք, որ քաղաքականության մեջ հազվադեպ է լինում: Երբ իրականությունը սկսում է նմանվել սցենարի, քաղաքականությունն էլ վերածվում է թատրոնի, որտեղ դերերն արդեն բոլորը գիտեն, բայց խաղը շարունակվում է։

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝