Շարքային նիկոլություն է. ԶԱՐՄԱՆՔ

Հաճելիորեն զարմանալ կարելի է մայր բուհում տեղի ունեցած դեպքերից: Նիկոլ Փաշինյանի հետ ուսանողների հանդիպումը բավական հետաքրքիր շրջադարձ է ունեցել: Ինչպես իրավապաշտպան Ռուբեն Մելիքյանն է նշում, գտնվել են համալսարանականի պատիվը բարձր պահած ուսանողներ, որոնք ոչ միայն տեղում ձայնը կտրած չեն նստել, այլեւ հրապարակավ խոսել են հանդիպման մանրամասների մասին։ «Մայր բուհում մասնակցեցի Նիկոլ Փաշինյանի հետ հանդիպմանը։ Իմ մասնակցության նպատակը պարզ էր. ցույց տալ, որ համալսարանը «проходной двор» չէ։ Այստեղ կան արժանապատիվ, ազգային մտածողություն ունեցող ուսանողներ, եւ այն չի կարող դառնալ իշխանական քարոզչության անցումային դահլիճ», - գրել է ԵՊՀ ուսանող ՀՈՎՀԱՆՆԵՍ ՇԱՄՐԻԿՅԱՆԸ եւ ներկայացրել, թե ինչպես է Արցախի ու եկեղեցու մասին հնչած հարցերից հետո՝ Փաշինյանը բորբոքվել, կարմրել եւ սկսել գոռգոռալ:

Երեւանի նախկին քաղաքապետ, իբրեւ ընդդիմադիր դարձած ՀԱՅԿ ՄԱՐՈՒԹՅԱՆԸ նշել է. «Քանի դեռ Նիկոլ Փաշինյանն ու «ավանդական ընդդիմությունը» միմյանց անկողին են մտել, երկրում բազում խնդիրներ կան, որոնք անմիջականորեն վերաբերում են մարդկանց կյանքի պայմաններին»։ Անդրադառնալով տրանսպորտին՝ նա հայտարարել է. «Ասում էիք՝ թանկացնում ենք, որ նոր շարժակազմ բերենք։ Քանի որ չեք բերում նոր շարժակազմ, դե հիմա էժանացրեք»։ Ինչ խոսք, այս հարցում Մարությանը ճիշտ է՝ թող էժանացնեն, բայց վերադառնանք նրա նախաբանին: Այն, որ արդեն մի քանի օր է Փաշինյանն ու իր կողակիցը սրբազանների անկողիններն են քչփորում իրենց հայտարարություններով, բոլորն են տեսնում: Բայց սա վերագրել, թե «Փաշինյանն ու «ավանդական ընդդիմությունը» միմյանց անկողին են մտել», նույնիսկ արեւմտյան սիրված երկակի ստանդարտների կիրառում չէ, այլ շարքային նիկոլություն է, հատկապես որ չկա նման բան ոչ հրապարակային ելույթներում, ոչ էլ ներքաղաքական կուլիսներում:

Ոչ պակաս ուշագրավ հայտարարությամբ է հանդես եկել ԱԺ փոխնախագահ ՌՈՒԲԵՆ ՌՈՒԲԻՆՅԱՆԸ: Նա նշել է, թե չգիտի՝ եկեղեցու հետ կապված հարցերում որ հարցերն են իրենց գործը, որոնք՝ ոչ, բայց մի բան հստակ գիտի՝ Բագրատ սրբազանի ասածն իրենց գործն է։ Նա հիշել է Բագրատ սրբազանի՝ մայիսի 30-ի հայտարարությունն ու գրառում արել. «Գերաշնորհ Տեր Բագրատ արքեպիսկոպոս Գալստանյանն ուղիղ եթերում հայտարարել է, որ տարբեր «աշխարհաքաղաքական ուժային կենտրոններ» իրեն ասել են հետեւյալը. «Ձեր երկիրը ցանկանում են դարձնել տարածք, որտեղ կիլոմետրաժը կարեւորություն չի ունենա, որտեղ կլինեն ԼԳԲՏ-ների բուծման վայրեր, որտեղ կլինի ընտանիքի նոր մոդելի կիրարկման վայր, որտեղ սահմանները կարեւոր չեն, ազգային արժեքներ եւ այլն, սրանք մոռացեք ամբողջությամբ, որը կլինի թմրանյութերի տարանցիկ միջանցք կամ կիրառման վայր, որը կլինի փողերի լվացման տարանցիկ միջանցք կամ վայր… Եթե դուք այս (իշխանության) փոփոխությունը չբերեք ձեր երկրում»: Ըստ Ռուբինյանի` ստացվում է, որ օտարերկրյա ուժային կենտրոնները կապ են հաստատել Բագրատ սրբազանի հետ, նկարագրել են Հայաստանը «սոդոմ գոմորի» վերածելու սցենար եւ նրան հորդորել են այս հիմքով իշխանափոխություն իրականացնել Հայաստանում։ «Եթե Գերաշնորհ Տերը ճիշտ է ասում, ապա ես չեմ կարող նրա առաջնորդած «Սրբազան շարժումը» անվանել որեւէ այլ կերպ, քան Հայաստանում օտարերկրյա ուժերի կողմից իրականացված հեղաշրջման փորձ, Գերաշնոր Տիրոջն էլ չեմ կարող անվանել որեւէ այլ կերպ, քան օտարերկրյա ուժային կենտրոնների ազդեցության գործակալ», - նշել է նա՝ փաստացի ոչ թե հերքելով Բագրատ սրբազանին, այլ անհանգստանալով, թե որտեղից է տեղեկացել այդ ծրագրի մասին:

 ԶԱՐՄԱՑԱԾ Է «ԻՐԱՎՈՒՆՔ»-Ը 

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝