«Փրայմ թայմ» մյուզիքլը՝ հուզիչ եւ արդիական ուղերձներով Թբիլիսիի բեմում

Թբիլիսիի Շոթա Ռուսթավելու անվան Ազգային թատրոնի բեմում մայիսի 30-ին տեղի ունեցավ Հակոբ Պարոնյանի անվան երաժշտական կոմեդիայի պետական թատրոնի հյուրախաղը։

Թատրոնը հանդիսատեսի դատին ներկայացրեց «Փրայմ Թայմ» միջազգային մյուզիքլը, որը մեծ ընդունելության արժանացավ թե՛ տեղացի, թե՛ օտարերկրյա հանդիսատեսի կողմից։ Ներկայացումը, անդրադառնալով փառքի, արժեհամակարգի խեղման եւ սոցիալական արդարության խնդիրներին, ներկայացրեց խորապես հուզիչ ու արդիական թեմաներ։

Պատմության առանցքում հերոսուհի Աննան է՝ մի երիտասարդ կին, ով հայտնվելով փառքի եւ փողի թելադրած մեխանիզմներում, փորձում է պահպանել ինքնությունը եւ պայքարում է սեփական ձայնը պահպանելու համար։ Մյուզիքլը շեշտադրում է, որ իրական հաջողությունն ու արժեքները պահանջում են պայքար ու պատասխանատվություն, իսկ յուրաքանչյուր քայլ կարող է շրջադարձային լինել։

Բեմադրությունը աչքի ընկավ երաժշտական եւ ռեժիսորական բարձր որակով։ Ստեղծագործական թիմը կարողացել էր հիանալի համադրել հուզական լարվածությունն ու դրամատուրգիական զարգացումը՝ ստեղծելով ամբողջական, վառ ու մտածելու տեղիք տվող ներկայացում։ Ներկայացման երաժշտական ձեւավորումը, որը կատարվել է պրոֆեսիոնալ երաժիշտների կողմից, ուժեղացրել էր բեմադրական ազդեցությունը՝ ստեղծելով հզոր դրամատիկական տրամադրություն։

Դերակատարներն էին՝ Թերեզա Մաթևոսյան, Մարիամ Գրիգորյան, Արսեն Գևորգյան, Աննա Մովսեսյան, Ալբերտ Ղազարյան, Գևորգ Դավթյան, Հայկ Մաթևոսյան, Յանա Թևանյան, Հովսեփ Նշանյան, Տիգրան Նահապետյան և Անգելինա Անտարյան։

Ներկայացման բեմադրիչն է Հակոբ Պարոնյանի անվան երաժշտական կոմեդիայի պետական թատրոնի գլխավոր ռեժիսոր Հակոբ Ղազանչյանը։ Թբիլիսյան հանդիսատեսի ջերմ ընդունելությունը, երկարատեւ ծափահարություններն ու արտիստների ոգեւորությունը վկայում են՝ հայաստանյան թատերական արվեստը շարունակում է հաստատուն քայլերով ներկայանալ միջազգային հարթակում՝ փոխանցելով ժամանակակից պատմություններ՝ համամարդկային արժեքներով։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝