«Քեզ եմ երգելու». Սիպիլն ու Անդրե Սիմոնյանը հայրենադարձության կոչ են անում (պրեմիերա)

«Պատասխան՝ 100 տարի անց» համալիր ծրագրի նախաձեռնությամբ կայացավ  պոլսահայ երգչուհի Սիպիլի և «The beautified project» ռոք խմբի հիմնադիր և մեներգիչ Անդրե Սիմոնյանի «Քեզ եմ երգելու» երգի տեսահոլովակի շնորհանդեսը:

ՀՀ սփյուռքի փոխնախարար ՍԵՐԺ ՍՐԱՊԻՈՆՅԱՆՆ իր խոսքում շեշտեց, որ այս զուգերգը կարող է անել ավելին, քան պետական քարոզչամեքենան. «Սա զրույց է սրտի հետ, երբ մարդու մեջ արթնանում է իր ինքնության գիտակցությունը, երբ երակներում զգում է իր նախապապերի արյան հոսքը, և ինչպես ժամանակին ասում էր Կոմիտասը՝ պանդուխտին տուն բերելու որոշումին կբեր»,- դա վկայեց նաեւ «The beautified project» ռոք խմբի հիմնադիր և մեներգիչ ԱՆԴՐԵ ՍԻՄՈՆՅԱՆԸ պատմելով Հայաստան վերադառնալու իր պատմությունը. «Առաջին անգամ Հայաստան եկա պապիկիս տեսնելու : Դա 1996 թվականի սեպտեմբերն էր: Շատ մութ էր Երևանում: Հանրապետության հրապարակում բազմաթիվ երիտասարդներ երգում էին «Երևան դարձած իմ Էրեբունի» երգը՝ պատրաստվելով սեպտեմբերի 21-ին: Ինձ թվում է՝ հենց այդ գիշեր սիրահարվեցի Հայաստանին: Տասը տարի շարունակ Անգլիայից Հայաստան էի գալիս որպես զբոսաշրջիկ: Պապիկիս երազանքն էր, որ նրա թոռներից մեկն ապրի Հայաստանում ու այստեղ շարունակի իր ուղին: Նրա մահից մեկ տարի անց ես տեղափոխվեցի ու արդեն 11 տարի ապրում եմ Հայաստանում»,- փաստեց Անդրեն ու շեշտեց որ «Քեզ եմ երգելու» երգը կարծես  իր անցած ուղու մասին է:

Պոլսահայ երգչուհու ապրումներն այլ են, ըստ ՍԻՊԻԼԻ իր զգացմունքները հասկանալու համար սփյուռքահայ լինելը բավական չէ, պետք է լինել պոլսահայ. «Իմ մանկությունը լի է եղել «ինչու»-ներով: Ինչո՞ւ փողոցում հարազատների ու բարեկամների հետ չի կարող խոսել հայերեն, ինչո՞ւ տանը հեռուստատեսությամբ չի կարող հայերեն հաղորդումներ դիտել և այլն: Այսպես փակ մեծացա, և ԱՄՆ-ից եկած փոքրիկ ձայներիզն առիթ դարձավ, որ սիրահարվեմ հայ երգին: Չեք պատկերացնում մեր ուրախությունը, երբ արբանյակային կապի շնորհիվ թուրքական հեռուստատեսությամբ առաջին անգամ հայկական երգեր լսեցինք: 2001 թվականին առաջին անգամ այցելեցի Հայաստան: Հանրապետության հրապարակում Անկախության տոնին նվիրված միջոցառմանն ականատես եղա: Զմայլված էի, աչքերս անընդհատ թաց էին: Երազում էի, որ մի օր այդ բեմում ելույթ կունենամ: Ուղիղ տասը տարի անց երազանքս իրականացավ: Մի օր էլ մտածեցի՝ ինչը՞ կարող է ինձ երջանկացնել: Հասկացա, որ երգելը, այն էլ՝ հայերեն երգելը: Ես հետևեցի սրտիս ձայնին, և դա իմ կյանքի ամենաճիշտ որոշումն էր»:

«Քեզ եմ երգելու» երգը հայրենադարձության կոչ է՝ ուղղված աշխարհասփյուռ հայությանը և ամփոփում է այն բոլոր զգացումները, որ ունենում է հայրենի հողի վրա առաջին անգամ ոտք դնող յուրաքանչյուր հայ։ Երգի հեղինակն է Հասմիկ Հախվերդյանը, գործիքավորումը` Կարեն Անանյանի, տեսահոլովակի ռեժիսոր` Դավիթ Այվազյան։

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝