«ԱՆՁՆՎԻՐԱԲԱՐ ԿՌԻՎ Է ՄՂԵԼ ՈՍՈԽԻ ԴԵՄ ՄԻՆՉԵՎ ՎԵՐՋԻՆ ՇՈՒՆՉԸ». ԱՆՄԱՀ ՀԵՐՈՍ ԹՈՐԳՈՄ ՍԱՅԱԴՅԱՆ

 2020 թվականի սեպտեմբերի 27-ին սկսված Արցախյան 44-օրյա ահաբեկչական պատերազմում ցավոք կորցրեցինք հազարավոր լուսավոր երիտասարդների, նրանցից մեկն էլ ԹՈՐԳՈՄ ԱՐԶՈՒՄԱՆԻ ՍԱՅԱԴՅԱՆՆ էր։ Մայիսի 22-ը նրա ծննդյան օրն է, կդառնար 24 տարեկան։ Անմահ հերոսի շիրիմին են այցելել հարազատներ, ընկերներ, համագյուղացիներ, ծաղիկներ խոնարհել ու խնկարկել։ Անմահ հերոսի բարեկամուհին, Iravunk. com -ի հետ զրույցում նշեց.

- Թորգոմը ծնվել է Արարատի մարզի Վերին Դվին գյուղում, բազմազավակ ընտանիքում։ Նա 12 տարեկան էր, երբ ընտանիքը տեղափոխվեց ՌԴ բնակություն հաստատելու։ Դեռ փոքրուց Թորգոմը շատ էր սիրում մեքենաներով խաղալ, իսկ երբ մեծացավ, որոշեց, որ աշխատանքը պետք է մեքենաների հետ կապված լինի, սովորեց ու սկսեց մեքենաներ նորոգել։ Թորգոմը համեստ, աշխատասեր ու ազնիվ անձնավորություն էր։ Նա 19 տարեկան էր, երբ վճռեց վերադառնալ հայրենիք պարտադիր զինվորական ծառայության անցնելու նպատակով։ Նրան միացավ ավագ եղբայրը Արթուրը։ Սայադյան ընտանիքում մեծ խնջույք կազմակերպեցին ու երկու եղբայրներին ուրախությամբ բանակ ճանապարհեցին։ Եղբայրները սիրով ծառայում էին հայրենիքին։ Արցախյան 44֊օրյա դաժան պատերազմի ծանր ու դժնդակ օրերին Թորգոմը մորը հորդորում էր չվհատվել ու նրանից թաքցնում էր, որ պատերազմին է մասնակցում։ Թորգոմը գնդացրորդ էր։ Երբ նենգ թշնամին անսպասելի հարձակում է գործում, անվախ Թորգոմը նետվում է մարտի ու անձնվիրաբար կռիվ մղում ոսոխի դեմ մինչև վերջին շունչը։ Հարազատ եղբոր աչքի առաջ թշնամու փամփուշտը խոցում է Թորգոմի սիրտը։ Եղբայրը շտապում է գրկել Թորգոմին։ Ավաղ, Թորգոմն անմահանում է եղբոր գրկում իր կյանքի գարունները նվիրելով հայրենիքի պաշտպանության Սուրբ գործին։ Հերոսաբար զոհվել է 2020 թվականի հոկտեմբերի 10֊ին, Մատաղիսում, ԱՀ «Արիության համար» մեդալակիր է։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ