ԳՅՈՒՄՐԻՈՒՄ ՀԱՐԳԱՆՔԻ ՏՈՒՐՔ ՄԱՏՈՒՑԵՑԻՆ ՀԱՅՐԵՆԱԿԱՆ ՄԵԾ ՊԱՏԵՐԱԶՄԻ ՀԱՂԹԱՆԱԿԻ ՀՈԲԵԼՅԱՆԱԿԱՆ 80-ԱՄՅԱԿԻ ԱՌԹԻՎ

Iravunk. com - ի Շիրակի մարզի թղթակիցը Գյումրիի «Մայր Հայաստան» հուշահամալիրում էր։ Հայրենական մեծ պատերազմի հաղթանակի հոբելյանական 80-ամյակի առթիվ մարդկանց հոսքը չէր դադարում դեպի «Մայր Հայաստան» հուշահամալիր «Անմար կրակի» մոտ, հարգանքի տուրք մատուցելով ֆաշիզմի դեմ պայքարում ամենաթանկը իրենց կյանքը զոհաբերած հերոսների պայծառ հիշատակին։

Անցկացվեց նաև «ԱՆՄԱՀՆԵՐԻ ԳՈՒՆԴ» հիշատակի և երախտիքի խորհրդանշական քայլերթը, որն ամեն տարի անցկացվում է հետխորհրդային գրեթե բոլոր երկրներում։ Երթի մասնակիցները շարժվեցին դեպի «Մայր Հայաստան» հուշահամալիր, որտեղ և տեղի ունեցավ Հաղթանակին նվիրված գլխավոր միջացառումները։ Ցավոք, շատ քիչ վետերաններ են մեզ մնացել մեզ հետ, սակայն նրանց հարազատները, ժառանգները երբեք չեն մոռանում և անպայման գալիս են հարգանքի տուրք մատուցելու։

ՔԱՋԻԿ ԽԱՉԱՏՐՅԱՆԸ, Շիրակի մարզի Հայրենյաց գյուղից էր եկել իր հարգանքի տուրքը մատուցելու, նա Iravunk. com - ի Շիրակի մարզի թղթակցի հետ բացառիկ զրույցում նշեց, որ նրա ծնողները ՆՈՐԱՅՐ և ԱԶԳԱՆՈՒՇ ԽԱՉԱՏՐՅԱՆՆԵՐԸ եղել են Հայրենական մեծ պատերազմի մասնակիցներ։ Մայրը բուժքույր է եղել պատերազմի թեժ օրերին ու վիրավորներին բուժել, պատերազմից հետո Հայրենյացի դպրոցում աշխատել է որպես մանկավարժ։ «Շատ հպարտ եմ, որ նման ծնողներ եմ ունեցել, նրանց կատարած սխրանքը երբեք չպիտի մոռանանք։ Ես ամեն տարի եմ գալիս այստեղ «Մայր Հայաստան» հուշահամալիր ծաղիկներ խոնարհելու, այսօր այն օրն է, որ չէի կարող տանը նստել ու չգալ, մեր պարտքն է հիշել բոլորին»։

Նշենք, որ «Մայր Հայաստան» հուշահամալիրում ռուս զինվորականները, ինչպես ամեն տարի, իրենց ձեռքով պատրաստած տաք ճաշը, զինվորական մյուս կերակուրները, թեյը հյուրասիրում էին մարդկանց։ Ի դեպ, նշեմ, որ մորական կողմի պապս ևս ՆԱՊՈԼԵՈՆ ՆԱԶԱՐՅԱՆԸ Հայրենական մեծ պատերազմի մասնակից էր, նա եղել է 89֊րդ Թամանյան դիվիզիայի մարտիկ, հրետանու հրամանատար, լեգենդար Նվեր Սաֆարյանի զինակիցն էր։ Իսկ տատիկիս քրոջ ամուսինը ՊԵՐՃ ԹԱԴԵՎՈՍԻ ՍՈՂՈՅԱՆԸ, ում ծննդյան հոբելյանական 100֊ամյակը լրացավ մարտի 15֊ին, եղել է լեգենդար մարշալ Հովհաննես Բաղրամյանի զինվորը։ Սոողոյանը, ինչպես և Նապոլեոն Նազարյանը, կռվել հասել են մինչև Բեռլին ու Ռայխստագի մատույցներում պարել Հայկական քոչարին։ Նրանք արժանացել են բազմաթիվ մեդալների ու շքանշանների, պետական բարձր պարգևների։ Այն տպավորությունը չէ, որ տոնի խորհուրդը կորել է, քանի որ մարդկանց հոծ բազմություն էր հավաքվել Գյումրիի «Մայր Հայաստան» հուշահամալիրում։ Հնարավոր չէ մոռանալ այն փառահեղ հաղթանակը, որը կերտվեց 80 տարի առաջ, մեր պապերի կողմից։

ՀՈՎՀԱՆՆԵՍ ՍԱՐԳՍՅԱՆ