Կյանքից հեռացել է գիտության եւ կրթության սերմնացանը. Հրանուշ Հակոբյանը ցավակցագիր է հղել

ՀՀ սփյուռքի հիմնադիր նախարար, իրավաբանական գիտությունների դոկտոր, պրոֆեսոր ՀՐԱՆՈՒՇ ՀԱԿՈԲՅԱՆԸ ցավակցագիր է հղել ականավոր ռադիոֆիզիկոս, ՀՀ ԳԱԱ ակադեմիկոս, ՌԴ գիտությունների ակադեմիայի արտասահմանյան անդամ, ֆիզիկամաթեմատիկական գիտությունների դոկտոր, պրոֆեսոր Ռադիկ  Մարտիրոսյանի մահվան կապակցությամբ։

«Սիրելի տիկին Ռենային, Մարտիրոսյան ընտանիքի անդամներին, ՀՀ ԳԱԱ-ի նախագահ պարոն Աշոտ Սաղյանին՝

Ցավով տեղեկացա, որ իր երկրային կյանքին հրաժեշտ է տվել մեր ժամանակների մեծանուն հայը, գիտության մեջ միջազգային ճանաչում ունեցող, ակադեմիկոս Ռադիկ Մարտիրոսյանը, ով խոր հետագիծ է թողել ճշգրիտ գիտությունների զարգացման ասպարեզում։ Ընդունեք խնդրեմ իմ ցավակցությունները, կիսում եմ ձեր վիշտը և խոնարհվում նրա պայծառ հիշատակի առջև։

Ռադիկ Մարտիրոսյանը կրթական, գիտական գործի հմուտ կազմակերպիչ էր, ով երկար տարիներ Երևանի պետական համալսարանի ռեկտորն էր, ապա 15 տարի լավագույնս ղեկավարեց ՀՀ գիտությունների ազգային ակադեմիան։ Ռադիկ Մարտիրոսյանը ծնվել և իր մանկությունն ու պատանեկությունն անցկացրել է հայրենի Արցախ աշխարհում։ Նա այն երջանիկներից է, ով հնարավորություն է ունեցել վայելելու Արցախի չնաշխարհիկ բնությունը, անդնդախոր ձորերն ու լեռները, ըմբոշխնելու Տիգրանակերտի, Ամարասի, Գտչավանքի, Հակոբավանքի խորհրդավոր հմայքն ու բազմադարյան պատմության խորին խորհուրդը։

Մանուկ հասակից նրան գրավել են Ղարաբաղի պայծառ ու աստղազարդ երկինքը, մթության մեջ լուսարձակող աստղերի կախարդական խաղը։ Այդ մտքերն ու ապրումները, ֆիզիկայի և մաթեմատիկայի նկատմամբ անսահման սերը նրան բերել են Երևանի պետական համալսարանի ֆիզիկամաթեմատիկական ֆակուլտետ, որը փայլուն ավարտելուց հետո շարունակել է իր պրպտումները ռադիոֆիզիկայի, աստղագիտության ոլորտներում և անխոնջ գիտնականի իր ճանապարհը սկսելով որպես ավագ գիտաշխատող՝ դարձավ ՀՀ գիտությունների ազգային ակադեմիայի ակադեմիկոս։

Նա ավելի քան 50 տարի դասախոսել է Երևանի պետական համալսարանում և երիտասարդությանը տարել ռադիոֆիզիկայի ու աստղագիտության բարդ ու հետաքրքիր աշխարհ, նրանց ծանոթացրել քվանտային ուժեղացուցիչների ստեղծման հնարավոր եղանակներին, ռադիոաստղագիտական կիրառություններին, քվանտային էլեկտրոնիկայի համար արհեստական բյուրեղների ստեղծման և այլ խրթին տեխնոլոգիաներին։

Մարտիրոսյանը ոչ միայն իր գործի գիտակ էր, հմուտ մանկավարժ, այլև ուսանողների խորհրդատուն ու բարեկամը։ Ռադիկ Մարտիրոսյանի և Հայաստանի գիտությունների ազգային ակադեմիայի հետ մեր սերտ համագործակցությունը սկսվեց 2008թ․ հոկտեմբերի առաջին օրերին, երբ հիմնադրվեց ՀՀ Սփյուռքի նախարարությունը և նրա բայրացկամ վերաբերմունքի և պետական մտածողությւան արդյունքում ՝ ՀՀ ԳԱ ակադեմիան դարձավ մեր կարևորագույն հենասյուներից մեկը և սիրով համաձայնվեց հայագիտության և հասարակական գիտությունների բաժանմունքի կազմում ընդգրկված բոլոր ինստիտուտներում բացել Սփյուռքի բաժին և համատեղ ջանքերով զբաղվել Սփյուռքի տվյալ ոլորտի ուսումնասիրման հարցերով և համատեղ տպագրել մոտ 100 գիտական աշխատություն։

Ռադիկ Մարտիրոսյանը իր հայրենիքին ու ժողովրդին անմնացորդ նվիրված, հայրենասեր և մարդասեր գիտնական-մտավորական էր, որի անունն ու գործը վառ կմնա մրա հարազատների, նրան ճանաչողների, ակադեմիական հանրության, նրա սաների սրտերում։ Ափսոս, հազար ափսոս․․․․ Հիշատակն արդարոց օրհնությամբ եղիցի», - գրել է Հրանուշ Հակոբյանը: