«Ուիգմոր Քլինիք»-ում մահացած 1-ամյա երեխայի ծնողները պնդում են՝ եթե «Վանաձոր» ԲԿ-ի որոշ բժիշկներ իրենց պարտականությունները պատշաճ կատարեին, երեխայի կյանքը կփրկվեր

Այս տարվա ապրիլի 29-ին «Ուիգմոր Քլինիք» բժշկական կենտրոնում մահացած 1-ամյա երեխայի ծնողները պնդում են, որ երեխան մահացել է «Վանաձոր» բժշկական կենտրոնի բժշկի անգործության և մասնագիտական պարտականությունները չկատարելու հետևանքով։

Այսօր՝ մայիսի 5-ին, երեխայի մայրը՝ Լոռու մարզի բնակիչ Աշխեն Կիրակոսյանը, SHAMSHYAN.com-ի թղթակցի հետ զրույցում ասաց․

«Մարտի 21-ին նկատեցինք որ երեխան իրեն վատ է զգում, անընդհատ փսխում է, նորմալ չի սնվում ու ամուսնուս հետ տարանք «Վանաձոր» բժշկական կենտրոն, որտեղ մոտեցանք բժիշկների պոստին ու մանկաբույժ Նավասարդյանին, ով պարապ կանգնած էր, դիմեցինք, ով պատասխանեց, որ դա իր պրոֆիլը չի, տեղ չունեն, ոչինչ չի կարող անել, քանի որ զբաղված է և տեղափոխենք ինֆեկցիոն բաժանմունք։ Տարանք այնտեղ ու ասացին, որ նոր սկսվող ինֆեկցիա է, այնինչ երեխան անընդհատ քնել էր ուզում, փսխում էր, ասացինք, որ տանը ճաշիկ է կերել, ասացին՝ հնարավոր է ճաշիկից լինի ու պառկեցրեցին։ Մինչև հաջորդ օրը մենք բուժվեցինք։ Հաջորդ օրը եկավ հերթապահ բժիշկ ու ասացինք, որ փսխումները նույն ձև առկա են, երեխան անընդհատ քնում է, կաթը ուտում, հետ է տալիս ու միայն սիստեմա է ստացել։ Արդեն երեկոյան երեխան սկսեց տհաճ հոտով փսխել, գույնը գցեց։ Հիվանդանոցի բժիշկ Գագիկ Ղամբարյանը հասկացավ, որ աղիքի ոլորում է, ինչից սեպտիկ շոկ է սկսվել ու պետք է շտապ վիրահատվի։ Մի կերպ կարողացանք «Ուիգմոր Քլինիք»-ից կանչել ռեանիմոբիլ, որով երեխային տեղափոխեցինք այնտեղ։ Միանգամից տարան ռեանիմացիա, որտեղ սկսեցին համապատասխան բուժումը, հետազոտություններ կատարեցին ու ասացին, որ պետք է շտապ վիրահատեն։ Նորմալ անցավ վիրահատությունը, որից հետո սկսեցին բուժել թոքաբորբի և արյան սեպսիսի դեմ։ Շուրջ 1 ամիս արեցին ամեն ինչ, ջանք ու եռանդ խչնայեցին, բայց ցավոք ապարդյուն։ Մեզ ասացին, որ ուշացած վիճակ է երեխայի մոտ, դրա համար չկարողացան պայքարել ու ապրիլի 29-ի առավոտյան երեխան մահացավ։ 

Մենք հասկանում ենք, որ մեր երեխային հետ չենք բերի, բայց ցանկանում ենք, որ մեր նման այլևս ոչ մեկ վիշտ չունենա։ Մենք վստահ ենք, որ եթե Վանաձորի հիվանդանոցի բժիշկ Նավասարդյանը զններ երեխային, հետազոտություններ նշանակեր ապա մեր երեխան մեր հետ կլիներ։ Մենք շատ գոհ ենք «Ուիգմոր Քլինիք»-ի անձնակազմից, ովքեր արեցին ամեն ինչ, բայց քանի որ հիվանդությունը արդեն բարդացել էր, այլևս հնարավոր չէր ոչինչ անել»։

Ինչպես ավելի վաղ հայտնել էրSHAMSHYAN.com-ը, ապրիլի 29-ին ողբերգական դեպք էր տեղի ունեցել «Ուիգմոր կանանց և երեխաների հիվանդանոցում»։ 

Մարտի 23-ին  Հանրապետության մարզերից մեկից ծայրահեղ ծանր ախտորոշմամբ, ռեանիմոբիլով նշված բժշկական կենտրոն էր տեղափոխվել 1-ամյա տղա երեխա։

Հիվանդանոցում բժիշկները մի քանի օր շարունակ պայքարել էին երեխայի կյանքի համար, սակայն հնարավոր չէր եղել փրկել նրա կյանքը։

Գ. Շամշյանի տեղեկություններով, մահացածը Վահե Գ.-ն է։

Դեպքի փաստով ՀՀ քննչական կոմիտեի Երևան քաղաքի քննչական վարչության Քանաքեռ-Զեյթունի քննչական բաժնում «սպանություն (հանկարծամահություն)» հատկանիշներով նախաձեռնվել է քրեական վարույթ։