Անմար ոգի, Սյունյաց քոչարի. Սյունիքում պարային հրավառություն է սպասվում

Հայրենական մեծ պատերազմի 80-ամյակին՝ մայիսի 9-ին եւ 10-ին Սյունիքի մարզը վերածվելու է հայ մշակույթի իրական կենտրոնի. Գորիսում եւ Կապանում կայանալու է «Սյունյաց քոչարի» համահայկական փառատոնը։ Այս մեծ մշակութային իրադարձությունը կյանքի կկոչվի «Ազդարար արտ պրոդաքշնի» նախաձեռնությամբ, որի հիմնադիրներն են Զավեն Խաչատրյանը եւ Ռոբերտ Մկրտչյանը:

Ի դեպ, ԶԱՎԵՆ ԽԱՉԱՏՐՅԱՆԸ նաեւ 10-ամյա «ԱԶԴ» Պարային ստուդիայի հիմնադիրն է եւ համանուն անսամբլի գեղարվեստական ղեկավարը, ում հետ էլ ծավալվեց «Իրավունք»-ի զրույցը:

«Արդեն վեց ամիս է, մենք զբաղված ենք այս փառատոնի կազմակերպմամբ։ Սա պարզապես միջոցառում չէ, այլ ազգային միասնության ու մշակութային ինքնության տոն է՝ ի նպաստ հայի ու Հայաստանի»,- ընդգծեց Խաչատրյանը։

Նշենք, որ փառատոնի գործընկերներն են Գորիսի «Լիլի Նարինյան» պարային դպրոցը՝ գեղարվեստական ղեկավար Լիլի Նարինյանի գլխավորությամբ եւ Կապանի «Դայմոնդ» պարային ստուդիան՝ Աղուն Հովհաննիսյանի ղեկավարությամբ։ Փառատոնը կայանալու է Գորիսի եւ Կապանի քաղաքապետարանների աջակցությամբ՝ քաղաքապետեր Առուշ Առուշանյանի եւ Գեւորգ Փարսյանի գլխավորությամբ:

Այս տոնական օրերին սպասվում է իսկական պարային հրավառություն՝ շուրջ 500 պարող-պարուհիներով Հայաստանի տարբեր մարզերից ու մայրաքաղաք Երեւանից: Զավեն Խաչատրյանի փոխանցմամբ՝ այն դառնալու է ֆլեշ մոբ. բոլոր պարային խմբերը Գորիսում եւ Կապանում միասին կպարեն Սյունյաց քոչարին՝ վերարտադրելով միասնականության, ուժի ու ազգային ոգու հզոր պատկերը։

«Սա միայն Սյունիքի տոնը չէ։ Սա ողջ հայության տոնն է, որի մեջ ներդրված է սեր, նվիրում ու հավատ դեպի մեր մշակույթը։ Սյունյաց քոչարին մեր արմատների ռիթմն է, մեր շարժումների հպարտությունը, մեր ապագայի հիշողությունը: Սա պատմական իրադարձություն է, որը կոչված է միավորել հայ ժողովրդին մշակույթի շուրջ՝ ուս ուսի տված, ձեռք ձեռքի բռնած։ Միացե՛ք մեզ եւ դարձե՛ք այս պատմության մասնիկը»,- եզրափակելով խոսքն՝ ասաց  Խաչատրյանը։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝