Երեւանը երգում է սիրո մասին

Մայիսի 1-ից մինչեւ հունիսի 7-ը Երեւանի գարնանային առօրյան նոր շունչ է ստանում՝ լի մեղեդիներով, հույզերով եւ սիրո ջերմությամբ։ «Սիրո երգերով՝ Երեւանում» խորագրով յուրօրինակ երաժշտական նախագիծը, որն իրականացվում է Շառլ Ազնավուրի անվան մշակույթի եւ արվեստի պետական քոլեջի նախաձեռնությամբ, մայրաքաղաքը վերածում է շարժման մեջ գտնվող բեմի։ Նախագծի սիրված հերոսն է երկհարկանի զբոսաշրջային ավտոբուսը, որը ամեն օր՝ ժամը 15։00-ից 17։00-ը, շրջում է քաղաքի տարբեր փողոցներով՝ ուղեկցվելով կենդանի երաժշտությամբ։

Ավտոբուսի ուղեւորները՝ անցորդներ, զբոսաշրջիկներ եւ երեւանցիներ, դառնում են երաժշտական ներկայացման կենդանի մասնակիցներ՝ լսելով ինչպես հայկական, այնպես էլ համաշխարհային հիթեր։ Նախագծին մասնակցում են քոլեջի տաղանդավոր ուսանողները, շրջանավարտներն ու ժամանակ առ ժամանակ՝ նաեւ շոուբիզնեսի ներկայացուցիչները։ Ամեն բան՝ սիրո մասին, Երեւանի համար։