Ինչ է տեղի ունեցել մոսկովյան հայտնի միջադեպի կուլիսներում

«Իրավունք»-ն անդրադարձել էր, որ Ռուսաստանում իշխող «Միասնական Ռուսաստան» կուսակցության նախաձեռնությամբ տեղի է ունեցել Հայրենական մեծ պատերազմի հաղթանակի 80-ամյակին նվիրված սիմպոզիում, որին մասնակցել են մի քանի տասնյակ երկրներից քաղաքական ուժերի ներկայացուցիչներ: Հայաստանից պատվիրակներն էին՝ Հայաստանի Հանրապետական կուսակցությունից` Էդուարդ Շարմազանովը, Տիգրան Աբրահամյանը, Հայկ Դերզյանը, «Բարգավաճ Հայաստան» կուսակցությունից՝ Իվետա Տոնոյանը, Արման Աբովյանը, Լուիզա Սարգսյանը։ Հենց սիմպոզիումի ժամանակ իր հակահայկական ելույթով իրավիճակը լարել է ադրբեջանական պատվիրակը, ինչին ի պատասխան, հայկական կողմից ստացել է համարժեք պատասխան ինչպես ՀՀԿ ԳՄ անդամ, ԱԺ էքս փոխնախագահ Էդուարդ Շարմազանովի, այնպես էլ` ԱԺ նախկին պատգամավոր, Գագիկ Ծառուկյանի մամուլի խոսնակ Իվետա Տոնոյանի կողմից: Իսկ թե ելույթներից հետո՝ այն, ինչ տեսախցիկներից այն կողմ էր, որեւէ շարունակություն ունեցե՞լ է միջադեպը, ինչպե՞ս են արձագանքել ներկաներն ու կազմակերպիչները, «Իրավունք»-ը նոր մանրամասներ է պարզել ԱԺ «Պատիվ ունեմ» խմբակցության քարտուղար, ՀՀԿ ԳՄ անդամ ՏԻԳՐԱՆ ԱԲՐԱՀԱՄՅԱՆԻՑ:

— Միջոցառման ավարտից հետո ադրբեջանական պատվիրակության հետ որեւէ այլ բան չեղավ: Մենք հանդիպեցինք միջոցառման նախաձեռնողների հետ, ներկայացրինք իրողությունը, որն, ըստ էության, շատ հստակ էր՝ Ադրբեջանի պատվիրակությունը, լավ իմանալով մեր մասնակցային ներկայությունը, փորձում էր թեմայից շեղվել եւ ձեւակերպումներ հնչեցնել Հայաստանի եւ Արցախի դեմ, ինչն անպատասխան չէր կարող մնալ: Նրանք գնացին սադրանքի, ինչը նաեւ կազմակերպիչների եւ ներկաների համար շատ ակնհայտ էր:

Ի դեպ, ասեմ, որ ադրբեջանական պատվիրակությունը սկզբնական շրջանում երկու հոգով էր ներկայացված: Երբ ադրբեջանական պատվիրակի ելույթից հետո նկատելի էր, որ հայկական կողմը արձագանքելու է, նրանք մի պահ դահլիճից նույնիսկ դուրս եկան, զանգերի մեջ էին, հետո արդեն պարզ դարձավ, թե ինչու: Ավելի ուշ միջոցառմանը ներկայացավ Մոսկվայում Ադրբեջանի դեսպանատան խորհրդականը: Ամեն դեպքում, նա այդպես ներկայացավ: Վերջինս փորձում էր թեման իր վրա վերցնել, քանի որ պատկերացնում էին արդեն, որ պետք է արձագանք լինի: Նա ցանկանում էր խոսք ստանալ կամ որեւէ ձեւով ընդհատել մեր ելույթները, ինչն ակնահայտորեն չստացվեց:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝