Հայաստանում է ֆրանսիացի դաշնակահար-իմպրովիզատոր Թիբո Մենիլոն

Հայաստանի պետական ֆիլհարմոնիան ապրիլի 25-ին՝ ժամը 19:30-ին, «Առնո Բաբաջանյան» համերգասրահում կհյուրընկալի մոդեռն դաշնակահար և իմպրովիզատոր Թիբո Մենիլոյին (Ֆրանսիա)։

Մենիլոն հայտնի է իր ինքնատիպ ու չկրկնվող երաժշտական մոտեցումներով․ նա ներդաշնակորեն համադրում է դասականը ջազայինի հետ։ Լինելով հայտնի ֆրանսիացի ջազ դաշնակահար, «սերունդների ուսուցիչ» բնորոշումը ստացած Ռոժե Մենիլոյի թոռը՝ դաշնակահարը մեծացել է արվեստագետների ընտանիքում՝  ժառանգելով ու ավելի կատարելագործելով իր երաժշտական ունակությունները: Արդյունքում ձևավորել է իր ուրույն ստեղծագործական ձեռագիրը։ Նրա երաժշտության վրա զգացվում է այնպիսի վարպետների ազդեցությունը, ինչպիսիք են Ջոն Կոլթրեյնը, Թելոնիուս Մոնքը, Կիթ Ջարեթը, Չիկ Կորեան ու Բիլ Էվանսը։ Թիբո Մենիլոն իր ելույթներում համադրում է զգացմունքն ու տեխնիկան։ Դաշնամուրի միջոցով նա ոչ միայն կատարում է երաժշտական ստեղծագործություններ, այլև կարծես ներկայացնում է պատմություններ՝ հանդիսատեսին տանելով յուրահատուկ հոգևոր ճանապարհներով։ Նրա իմպրովիզացիաները երաժշտության լեզվով մատուցվող պատումներ են մարդկանց ու տիեզերքի մասին։

Հատկանշական է դաշնակահարի ամուր կապը Հայաստանի հետ․ նրա կինը՝ հայուհի Արմինե Օհանյանն է՝ Ֆրանսիայում ստեղծագործող հագուստի դիզայներ, ով լայն ճանաչում ունի ֆրանսիական նորաձևության ասպարեզում իր յուրահատուկ ձեռագրով։

Ապրիլի 25-ին (ուրբաթ) կայանալիք համերգը հայ հանդիսատեսի համար ևս մեկ հնարավորություն է՝ բացահայտելու Թիբո Մենիլոյի եզակի երաժշտական աշխարհը։ Կներկայացվեն իմպրովիզացիոն կատարումներ՝ ոգեշնչված Բախից, Ռավելից, Դեբյուսիից, Մեսիանից, Սկարլատիից, Կոմիտասից, Գյուրջիևից,  Սթիվ Ռայխից ու Քեյթ Ջարեթից։