«Մեզ համար կարմիր գիծ է»․ Թուրքիայի և Իսրայելի ներկայացուցիչները հանդիպել են Ադրբեջանում

Իսրայելցի բարձրաստիճան պաշտոնյան հաստատել է, որ թուրքական և իսրայելական պատվիրակությունները երեկ հանդիպել են Ադրբեջանում՝ քննարկելու Սիրիայում անցանկալի միջադեպերը կանխելու նպատակով ստեղծված դեէսկալացիայի մեխանիզմը, հաղորդում է The Times of Israel-ը։

«Հանդիպման ընթացքում Իսրայելը հստակեցրեց, որ Սիրիայում օտարերկրյա ուժերի տեղակայման ցանկացած փոփոխություն, մասնավորապես՝ Պալմիրայի (Թադմոր) տարածքում թուրքական բազաների ստեղծումը, կարմիր գիծ է», - ասել է պաշտոնյան։

Նա նաև նշել է, որ Իսրայելը հստակեցրել է, որ նման ցանկացած գործունեության կանխումը Դամասկոսի կառավարության պատասխանատվությունն է։ Իսրայելին սպառնացող ցանկացած գործունեություն կսպառնա Սիրիայի նախագահ Ահմեդ ալ-Շարաայի կառավարմանը։

Թուրքական նախարարության աղբյուրները նույնպես հաստատել են Ադրբեջանում տեղի ունեցած բանակցությունները՝ նշելով, որ դրանք նշանավորում են տարածաշրջանում երկու երկրների գործողությունների միջև հնարավոր բախումներից կամ թյուրըմբռնումներից խուսափելու համար այդպիսի ալիք ստեղծելու ջանքերի սկիզբը։

«Այդ մեխանիզմի ստեղծմանն ուղղված ջանքերը կշարունակվեն», - ասել է աղբյուրներից մեկը՝ առանց բանակցությունների շրջանակի և ժամկետների վերաբերյալ լրացուցիչ մանրամասներ հաղորդելու։