Բացահայտվել են սուվորովին առանձնակի դաժանությամբ սպանողները

Մարտի 31-ին՝ ժամը 11։17-ին ոստիկանություն ահազանգած տղամարդը հայտնել է, որ Երեւանի Համո Սահյան փողոցի թիվ 11 տանը բնակվող ընկերը շուրջ երկու օր է չի պատասխանում հեռախոսազանգերին։ Ահազանգի հետքերով մեկնել են Քրեական ոստիկանության եւ Համայնքային ոստիկանության մի շարք ստորաբաժանումների ծառայողներ։ Դեպքի վայրում հայտնաբերվել է միայնակ բնակվող Մարատ Սուվորովի դին։

54-ամյա տղամարդու ձեռքերն ու ոտքերը կապկպված էին։ Մարմնին կային մի քանի տասնյակ կտրած-ծակած վնասվածքներ։ Դին ննջարանում էր՝ հատակին, որտեղ ամբողջությամբ արնանման հետքեր էին։ Մարատ Սուվորովի բնակարանի դուռը բաց էր, տունը՝ խառնշտված։ Ակնհայտ էր, որ իրավապահները գործ ունեին առանձնակի դաժանությամբ եւ շահադիտական դրդումներով կատարված սպանության հետ:

Մարատ Սուվորովը զբաղվում էր թանկարժեք մետաղադրամների առուվաճառքով։ Դեպքի վայրում, մասնավորապես՝ տան նախասրահում թափված մետաղադրամներ կային։ Վարկած է առաջ քաշվել, որ սպանությունը կատարվել է բնակարանում եղած թանկարժեք մետաղադրամները հափշտակելու նպատակով։

ՔՈԳՎ ԵՔՎ մարդու դեմ ուղղված հանցագործությունների դեմ պայքարի բաժնի ավագ քրեական ոստիկան, ոստիկանության կապիտան Հայկ Հակոբյանի խոսքով՝ առանձնապես ծանր հանցանքը կատարելու կասկածանքով իրենց օպերատիվ տեսադաշտում հայտնվել են չորս անձ։ Նախ պարզել են, որ նրանցից Երեւանի բնակիչներ 58-ամյա Վահրամ Ա․-ն եւ 35-ամյա Արամ Օ․-ն դեռեւս 2024 թվականի ամռանը հափշտակված մետաղադրամներ են տվել Մարատ Սուվորովին՝ վաճառելու նպատակով։ Այս առթիվ նրանց միջեւ ձեւավորվել է որոշակի հարաբերություններ, ինչի արդյունքում նրանք տեղեկացել են, որ Մարատ Սուվորովն իր մոտ մշտապես պահում է թանկարժեք մետաղադրամներ:

Երեւանի քրեական ոստիկանները պարզել են նաեւ, որ Վահրամ Ա․-ն եւ Արամ Օ․-ն Մարատ Սուվորովի բնակության կոնկրետ հասցեն պարզելու նպատակով դիմել են իրանց ծանոթ, Երեւանի բնակիչ, 28-ամյա Հարութ Կ․-ին։ Վերջինս, այսպես ասած, հետեւել է Մարատ Սուվորովին, պարզել նրա տան հասցեն եւ տվյալը փոխանցել Վահրամ Ա.-ին եւ Արամ Օ.-ին։

Իրենց հանցավոր մտադրությունը բարեհաջող իրականացնելու նպատակով Երեւանի բնակիչ 58-ամյա Վահրամ Ա․-ն այդ մասին հայտնել է նաեւ 38-ամյա որդուն։

Նախնական տվյալներով՝ 2025 թվականի մարտի լույս 30-ի գիշերը Արամ Օ․-ն, Վահրամ Ա․-ն եւ նրա որդին գնացել են Երեւանի Համո Սահյան փողոց։ Արամ Օ․-ն եւ Վահրամ Ա․-ն ապօրինի մուտք են գործել միայնակ բնակվող Մարատ Սուվորովի առանձնատուն, կապել են նրա ձեռքերն ու ոտքերը, սուր կտրող-ծակող առարկայով բազմաթիվ հարվածներ են հասցրել մարմնի տարբեր մասերին, այդ թվում՝ կոկորդին, ինչի հետեւանքով Մարատ Սուվորովը մահացել է։ Այնուհետեւ նրա բնակարանից հափշտակել են թանկարժեք մետաղադրամներ եւ այլ իրեր։ Այդ ընթացքում Վահրամ Ա․-ի որդին եղել է ավտոմեքենայում՝ սպասելով Մարատ Սուվորովի տուն մտած հորն ու Արամ Օ․-ին։

Օպերատիվ աշխատանքի արդյունքում Երեւանի քրեական ոստիկաններին հաջողվել է պարզել նաեւ, որ Մարատ Սուվորովի բնակարան մտած Արամ Օ․-ն եւ նրա բնակարանի տեղը պարզած Հարութ Կ․-ն դեպքի հաջորդ օրը մեկնել են Տավուշի մարզ՝ երկրի սահմանը հատելու եւ գողոնը Հայաստանից դուրս իրացնելու նպատակով, սակայն չեն հասցրել դա անել, քանի որ ձերբակալվել ու տեղափոխվել են ՔՈԳՎ Երեւան քաղաքի վարչություն:

Արամ Օ․-ի անձնական խուզարկությամբ հայտնաբերվել է Մարատ Սուվորովին պատկանող դրամապանակը, Գրիգոր Նարեկացու պատկերով ոսկյա շքանշան եւ մի քանի տասնյակ արծաթե ու բրոնզե մետաղադրամներ։

Հետագա միջոցառումների արդյունքում պարզվել է նաեւ Վահրամ Ա․-ի եւ նրա որդու գտնվելու վայրերը։ Նրանք եւս հայտնաբերվել ու ձերբակալվել են… Չորսն էլ կալանավորվել եւ տեղափոխվել են քրեակատարողական հիմնարկներ։ Նախաքննությունը շարունակվում է։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝