Եթե վաղը, մյուս օրը Վարդան Ղուկասյանը կրկին իրեն պահի ինչպես 2018-ին, այս անգամ ներում չի լինելու. Կարապետյան

«Փաստացի արդեն Գյումրիում ևս ՔՊ-ն պարտվեց։ Եվ առաջին հերթին՝ ապրեն բոլոր ընդդիմադիր ուժերը, ովքեր մի կողմ դրեցին սեփական ամբիցիաները ու ցուցաբերեցին իրական քաղաքական ողջամտություն՝ հայտարարելով, որ պատրաստ են քվեարկել այն թեկնածուի օգտին, ով ստացել է ընդդիմադիր դաշտի ձայների մեծամասնությունը։ Էլ ավելի կարևոր է այն, որ նրանք հստակ ասացին՝ կոալիցիա չեն կազմում, որևէ պաշտոնի չեն հավակնում, հետևաբար՝ քաղաքական պատասխանատվություն չեն կրում Վարդան Ղուկասյանի որոշումների համար։ Մաքուր դիրքորոշում՝ առանց «բայց»-երի։ Եվ այո, եթե վաղը, մյուս օրը Վարդան Ղուկասյանը կրկին իրեն պահի այնպես, ինչպես 2018-ին՝ երբ իր ներսի «հեղափոխականը» արթնացած էր, ապա ոչ ոք՝ ո՛չ Կարենին, ո՛չ Ռուբենին, ո՛չ էլ Մարտունին մեղադրելու քաղաքական իրավունք չունի։

 

Իսկ հիմա՝ ամենակարևորը՝ ինչու՞ սա լավագույն լուծումն էր։ Ոմանք ասում էին՝ բա ինչու երեք ուժերը միասին չմիացան, թող Վարդանը գար ու միանար իրենց։ Բայց եկեք անկեղծ լինենք՝ էդ տարբերակով երեք ուժերն էլ կզբաղվեին քաղաքական թատերականությամբ, մրցելով ոչ թե արդյունքի, այլ դերակատարման համար։ Արդյունքում Վարդանը կասեր՝ չեմ միանում, կատու կտար պատերին, ու գնալու էին արտահերթ ընտրությունների, որտեղ ՔՊ-ն՝ իր հայտնի մեթոդներով, նորից փորձելու էր վերադառնալ եւ այս անգամ վստահ եմ` ստացվելու էր։

 

Հետևաբար այս տարբերակը՝ աջակցել իրականում հաղթած թեկնածուին առանց որևէ պայման կամ պաշտոն պահանջելու, միակ ողջամիտ և երկարաժամկետ հեռանկար ունեցող որոշումն էր։ Այժմ՝ Վարդան Ղուկասյանի մասով։ Եթե, Աստված մի արասցե, մի օր տեսնենք նրան մի փունջ վարդով խոնարհված՝ Աննա Հակոբյանի առաջ, ժողովրդին էլ ասելով՝ «ես քրիստոնյա եմ, ներողամտությունը բարձրագույն արժեք է»՝ թող իմանա, որ այս անգամ ներում չի լինելու։ Ո՛չ Աստվածաշնչյան մեջբերումները, ո՛չ էլ խոնարհ աղոթքները չեն փրկելու նրան։ Եվ այս անգամ չի կարողանալու թաքնվել քաղաքական ֆարսի հետևում», - գրել է նա։