«Իսկանդերը» ոչնչացրել է ռեստորանը, որտեղ հանդիպում էին արեւմտյան եւ ուկրաինական սպաները (Տեսանյութ)

Բավականին մեծ աղմուկ է ծավալվել ուկրաինական Կրիվոյ Ռոգին երեկ «Իսկանդերի» հասցրած հարվածի հետ կապված:

Պատմությունը հետեւյալն է: Նախ հայտնվեց տեղեկատվությունը, թե ռուսները հրթիռային հարձակում են իրականացվել Կրիվոյ Ռոգի Magellan ռեստորանի վրա։ Գրեթե անմիջապես էլ ուկրաինական տեղեկատվական դաշտը սկսեց աղմկել, թե հարվածը հասցվել է կասետային մարտագլխիկով հրթիռով, ինչը հանգեցրել է բազմաթիվ զոհերի խաղաղ բնակիչների, այդ թվում՝ երեխաների շրջանում։

Ապա խառնվեց նաեւ Ուկրաինայում ԱՄՆ դեսպան Բրիջիթ Բրինքը: Ճիշտ է, առանց Ռուսաստանին մեղադրելու, սակայն կոչ անելով` դադարեցնել պատերազմը։ «Սարսափում եմ, որ այս գիշեր Կրիվոյ Ռոգի մանկական խաղահրապարակի և ռեստորանի մոտ հրթիռ է ընկել: Ավելի քան 50 մարդ վիրավորվել է, 16-ը զոհվել, այդ թվում՝ 6 երեխա: Ահա թե ինչու է պատերազմը պետք ավարտվի», - գրել է Բրինքը X-ում:

Ուշագրավ միտք դեսպանի խոսքում, այնուամենայնիվ կա. հարվածը հասցվել է «մանկական խաղահրապարակի և ռեստորանի մոտ»:

Եվ ահա, ի հայտ եկած հետագա փաստերի արդյունքում նաեւ ուկրաինական մի շարք աղբյուրները սկսեցին հաստատել, որ իրականում պատկերը «մի փոքր» այլ է: Նախ, ականատեսների տարածած տեսանյութերում ֆիքսված է ծխի և փոշու մեծ սյուն: Իսկ դա յուրահատում է ոչ թե կասետային, այլ սովորական մարտագլխիկով կոնկրետ թիրախի հարվածելու դեպքում. կասետային մարտագլխիկներր դեպքում պայթյունը շատ ավելի մեծ մակերես է վերցնում, եւ հենց դա է այդ զինատեսակի իմաստը։ Ու այդ փաստը ուզած թե չուզած ընդունում են նաեւ ուկրաինական աղբյուրները:

Դա նաեւ հաստատում է, որ հարվածը հասցվել է կոնկրետ օբյեկտի` Magellan ռեստորանին, ինչպես ի սկզբանե գրել էին ուկրաինական աղբյուրները։ 

Հաստատված է նաեւ տեղեկությունը, որ հարվածի պահին ռեստորանի շրջակայքում անվտանգության ապահովմամբ մինչև 15-20 ամենագնաց է եղել։ Իսկ բուն ռեստորանում տեղի է ունեցել Ուկրաինայի զինված ուժերի հրամանատարական կազմի և օտարերկրյա սպաների (այդ թվում` միանգամայն բարձրաստիճան) հանդիպում։ Ավելին, ուկրաինական մի շարք տեղեկացված աղբյուրներ հաստատում են, որ խոսքը եվրոպական, հիմնականում` ֆրանսիական եւ բրիտանական սպաների մասին է, ովքեր Կիեւում էին` Ուկրաինակում ֆրանս-բրիտանական ուժեր տեղակայելու հետ կապված ինչ-ինչ հարցեր քննարկելու համար: Ուկրաինական կողմն էլ հանդիպում-քննարկումը կազմակերպել է հենց «մանկական խաղահրապարակի» մոտ գտնվող ռեստորանում: Դիտավորյա՞լ, երեխաներին «կենդանի վահան» օգտագործելո՞վ, թե՞ ինչ-որ մեկի խելքն այդքան է հերիքել. դա արդեն ուկրաինացիների պարզելու հարցն է: Առավել եւս, եթե հաստատում են, որ արդյունքում խաղաղ քաղաքացիներ են զոհվել:

Այսպիսով, ռուսները հարվածել է կոնկրետ թիրախի, թերեւս լավ տեղեկացված լինելով, թե ովքեր են այդ շինությունում եւ ինչ նպատակով. որ հարվածը հասցվել է հենց հանդիպման պահին, այդ մասին է վկայում: Իսկ ահա ՌԴ ՊՆ-ի հաստատմամբ, հարվածի արդյունքում ոչնչացվել են օտարերկրյա պետությունների եւ ուկրաինական մինչև 85 սպաներ, ինչպես նաև մինչև 20 միավոր ավտոմոբիլային տեխնիկա։

Այսինքն, թեման ակնհայտ քաղաքական դաշտում է: Եթե հայտնի դառնա, որ զոհվել են ֆրանսիական եւ բրիտանական սպաներ, դա լուրջ խնդիր կարող է դառնալ Ուկրաինական տարածքում ֆրանս-բրիտանական «խաղաղապահներ» տեղադրելու ծրագրերի հետ կապված: Առավել եւս, որ Մոսկվան ի ցույց դրեց` այդ անձիք կհամարվեն թիրախ: Այսինքն, ավելի նման է, որ սրա շուրջ աղմուկը կոծկելու համար է, որ նման աղմուկ են սարքել «մանկական խաղահրապարակի» հետ կապված: