Լավ, կարելի՞ է չէ` մի քիչ ձեզ համեստ պահեք. ԶԱՐՄԱՆՔ

Գյումրիի ՏԻՄ ընտրությունների արդյունքում երկրորդ տեղը զբաղեցրած նախկին քաղաքապետ ՎԱՐԴԱՆ ՂՈՒԿԱՍՅԱՆԸ, թվում էր, որ գոնե շնորհակալ պիտի լինի, որ մյուս ընդդիմադիր ուժերը միանում են իրեն, որպեսզի դառնա քաղաքապետ: Բայց, զարմանալիորեն, ընկեր Վարդանիկի ախորժակն այնքան է բացվել, որ անգամ փոխքաղաքապետի պաշտոն չի ուզում զիջել մյուս ընդդիմադիր ուժերին: Լավ, կարելի՞ է չէ` մի քիչ ձեզ համեստ պահեք, որ սիրվեք ձեզ ընտրող ու չընտրողների կողմից: «Վարդան Ղուկասյանը մի փոխքաղաքապետ չի ուզում տա իր ընդդիմադիր գործընկերներին, բա ո՞նց եք պատկերացնում իրեն միացողների վիճակը, երբ ինքը սկսի միանձնյա որոշումներ կայացնել: Եվ երկրորդ՝ նա չի հաղթել այս ընտրություններում եւ իրավունք չունի հաղթողի դերից խոսելու, հաղթել է ողջ ընդդիմադիր հատվածը, եւ նա այդ հատվածի մի մասն է ընդամենը», - փաստում է Ռեֆորմիստների կուսակցության նախագահ Վահան Բաբայանը: Իսկ Վ. Ղուկասյանն արդարանում է. «Փոխքաղաքապետի հետ կապված` ասեմ ձեզ, եթե ինձ ձերբակալեն, ինքնըստինքյան փոխքաղաքապետը դառնում է քաղաքապետ։ Այ, էդ պահը կա, թե չէ, միանշանակ ես խնդիր չունեմ` աշխատելու հետ կապված»:

Մինչ բոլորի համակ ուշադրությունը Գյումրիի հետընտրական իրավիճակն է՝ կրկին կրքեր են բորբոքվել ԱԺ «Հայաստան» խմբակցությունից դուրս եկած անկախ պատգամավոր ԳԵՂԱՄ ՆԱԶԱՐՅԱՆԻ շուրջ: Խորհրդարանում անհետ կորած զինծառայողների ծնողների հետ հանդիպման ժամանակ միջադեպ է եղել վերջինիս հետ: Բանը հասել է նույնիսկ նրան, որ վիճաբանությունն ու գոռգոռոցները տեղափոխվել է խորհրդարանական միջանցք: Ի՞նչ է կատարվել իրականում, Նազարյանն այսպես է պարզաբանել. «Հանդիպմանը ներկա հերոսի հարազատը հարց ուղղեց ՔԿ նախագահ Պողոսյանին՝ ի՞նչ եք մտածում, ի՞նչ պետք է արվի այն տղաների մարմինների հետ, որոնց ծնողները հրաժարվում են ընդունել, որ դա իրենց որդիների մարմիններն է։ Պողոսյանը հարցին, իմ կարծիքով, ինչ-որ այլ պատասխան տվեց, ես ընդհատեցի, ասացի՝ եթե կարելի է պարզաբանեմ, թե ինչի մասին է խոսքը․ առաջին հերթին նրա մասին է, թե ինչ պետք է անենք մենք՝ պետությունը, եթե մի քանի անգամ ԴՆԹ թեստ անելուց հետո հաստատվում է, որ մարմինը պատկանում է այսինչ հերոսին։ Ի՞նչ անենք, եթե մարդիկ հոգեբանական կամ այլ տեսանկյունից չեն ուզում ընդունել իրականությունը։ Այդ ընթացքում մի քանի ծնողներ վրդովվեցին»: Գեղամ Նազարյանը զարմանք է հայտնում, որ թյուրընկալում է եղել, իսկ անհետ կորածների ծնողները բղավում էին. «Գործ չունես մեր զավակների հետ, մեր տղաների անունները չտաս»: Հետաքրքիր է՝ ինչպե՞ս է ստացվում, որ միշտ նման պատմությունների մեջ հայտնվում է հենց Գեղամ Նազարյանը:

Իսկ Ազգային ժողովի «Քաղաքացիական պայմանագիր» խմբակցությունից վռնդված պատգամավոր ՀՈՎԻԿ ԱՂԱԶԱՐՅԱՆՆ աչքի է ընկել մտքի հերթական «փայլատակումով»: Լրատվամիջոցներից մեկի հետ զրույցում, անդրադառնալով Գյումրիում կայացած ավագանու արտահերթ ընտրություններին, նա ո՛չ ավել, ո՛չ պակաս ասել է. «Գյումրեցիներն իրենց ընտրությունը կատարել են: Ինչ մնում է հնարավոր ելքերին, ամենահավանական ելքերից մեկն այն է, որ ենթադրում եմ՝ ՔՊ-ն կմիանա Մարտուն Գրիգորյանին, եւ քաղաքապետը կլինի Մարտուն Գրիգորյանը»: Ու զավեշտն այն է, որ լուրջ-լուրջ է խոսում: Ի՞նչ ասես, շնորհավոր ապրիլի 1: Կամ էլ, կարո՞ղ է սա Աղազարյանի միջոցով Նիկոլի կողմից արված առաջարկ է:

ԶԱՐՄԱՑԱԾ Է «ԻՐԱՎՈՒՆՔ»-Ը