Չի բացառվում, որ ՔՊ-ականները սկսեն կրակել լրագրողների վրա. Կորյուն Սիմոնյան

Գյումրիում տեղի ունեցած արտահերթ ՏԻՄ ընտրությունների ավարտից հետո՝ տեսախցիկների առաջ, ԱԺ ՔՊ-ական պատգամավոր Վիլեն Գաբրիելյանը՝ նույն ինքը Նավակ Ճոճողը, հարձակում է գործել «Եվրոմեդիա 24» միջազգային հեռուստաընկերության լրագրող Կորյուն Սիմոնյանի վրա: Սեռական բնույթի հայհոյանքներ է հնչեցրել, կռիվ հրահրել, անպարկեշտ վարքագիծ է դրսեւորել, նաեւ փորձել է քաշքշել լրագրողին: Պատգամավորը, ինչպես նաեւ նրան ուղեկցող անձը, եղել են անսթափ վիճակում, ինչ-որ բանի ազդեցության տակ: Տարածքում գտնվող ոստիկանները չեն միջամտել վիճաբանությանը եւ դիտորդի դերում են եղել: Այս մասին «Իրավունք»-ը զրուցել է ԿՈՐՅՈՒՆ ՍԻՄՈՆՅԱՆԻ հետ:

— Ողջ հանրությունն ականատես եղավ ՔՊ-ական պատգամավոր Վիլեն Գաբրիելյանի լկտի պահվածքին Ձեր հանդեպ: Լրագրողական համայնքը պահանջում էր պատգամավորից, որ ներողություն խնդրի: Արդյոք դա բավարար կլինի՝ միջադեպը փակված համարելու համար:

— Ինձ Վիլեն Գաբրիելյանի ներողությունն առհասարակ պետք չէ, ես համոզված եմ, որ այդ վարքագծով անձն ընդհանրապես չի կարող պատգամավորի պաշտոն զբաղեցնել։ Վիլեն Գաբրիելյանը պետք է վայր դնի մանդատը, իսկ իրավապահ մարմինները պետք է հարուցեն քրեական վարույթ՝ նրա խուլիգանական վարքագծին քրեաիրավական գնահատական տալու համար։

— Կան տեսակետներ, որ Վիլեն Գաբրիելյանն իրականում հարբած չէր, այլ թմրանյութի ազդեցության տակ էր: Դուք նրա հետ կարճատեւ շփում ունենալիս ի՞նչ տպավորություն ստացաք:

— Ես ոչինչ չեմ բացառում, Վիլեն Գաբրիելյանը ակնհայտ անսթափ էր։ Դրա համար եմ ասում, որ պետք է հարուցվի քրեական վարույթ, որպեսզի պարզվեն այդ բոլոր հանգամանքները, եւ եթե պարզվի, որ նա թմրանյութի ազդեցության տակ է եղել, ապա դրա համար եւս պետք է պատասխանատվություն կրի։

— Ի՞նչ քայլեր եք պատրաստվում անել, արդյո՞ք դիմելու եք Ազգային ժողովին, օրինակ, էթիկայի հանձնաժողով ձեւավորելու համար կամ դիմելո՞ւ եք դատարան՝ Ձեր պատվին ու արժանապատվությանը հասցված վնասի փոխհատուցման պահանջով:

— Էթիկայի հանձնաժողով ձեւավորելու հարցով միանշանակ դիմելու ենք, մոտ ապագայում նաեւ լրագրողների ստորագրահավաք կիրականացնենք այդ հարցով։ Պատգամավորի լկտի վարքագիծը պետք է համապատասխան գնահատականին արժանանա, իսկ եթե այն մնա անպատասխան, ապա մոտ ապագայում չի բացառվում, որ ՔՊ-ականները սկսեն կրակել լրագրողների վրա։

— Մինչ այս պահը՝ Մարդու իրավունքների պաշտպանի գրասենյակից կապ հաստատե՞լ են Ձեզ հետ կամ որեւէ պատկան մարմնից, իշխանական պատգամավորներից փորձեր եղե՞լ են միջադեպը հարթելու համար:

— Ես տեսանյութը ուղարկել եմ ՄԻՊ խոսնակին, սակայն մինչ այժմ ՄԻՊ-ից արձագանք չեմ ստացել։ ՔՊ-ականներից եւս որեւէ արձագանք չկա, հավանաբար չգիտեն, թե ինչպես անդրադառնան Վիլեն Գաբրիելյանի պահվածքին։

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝