Սենց չեն պայքարում, սաղ սուտ ա, մեզ խաբում են. իրավապաշտպան

Ազատության հրապարակում արցախցիների հանրահավաքի ավարտին, երբ դեռ որոշվում էր՝ մնան, թե գնան, բարձրախոսով փորձ արեց ներկաներին դիմել միջազգային իրավապաշտպան ԴԱՎԻԹ ՀԱՐՈՒԹՅՈՒՆՅԱՆԸ, որը հայտնի է տեւական ժամանակ կառավարության դիմաց միայնակ ակցիաներ իրականացնելով: Սակայն, հանրահավաքի կազմակերպիչները միջամտեցին եւ ոստիկանությանն էլ հորդորեցին հեռացնել նրան տարածքից: Ինչ  էր ուզում ասել` «Իրավունք»-ը փորձեց պարզել նրանից:

— Գիտեք, 5 տարի է` մեր ժողովրդին սուտ են ասում, ու այդ ստերի հետեւանքով մենք հողեր ենք կորցնում ու հայտնվել ենք այս վիճակում: Իմ ասածն այն էր, որ քանի այսքան մարդ է հավաքվել, պետք է խնդիրը լուծենք: Իսկ եթե՝ ոչ, ասեմ, թե ինչ է լինելու հետո: Ժողովուրդը գործերով է ընկնելու, նորից չեն գալու մասնակցեն ցույցերի ու այդ ժամանակ էլ ասելու են՝ տեսաք, ուզում էինք մի բան անեիք, ժողովուրդը չհավաքվեց: Պարզապես, կազմակերպիչներն էլ հույս չունեին, որ այդքան մարդ կհավաքվի: Մարդիկ հավաքվել էին, պատրաստ էին պայքարի, բայց իրենց ասացին՝  գնացեք տներով, սա սխալ էր: Նույնն արեց Բագրատ սրբազանը: Փոխանակ ասեր՝ գնացեք դեպի կառավարության շենքերի մոտ, դռները փակեք, թող Նիկոլ Փաշինյանն իր կամքով թողնի աթոռը, ասաց՝ գնանք Մեսրոպ Մաշտոցի պողոտա, ման գանք: էդ ման գալու խաթր ժողովուրդը էլ չի ուզում մասնակցի հանրահավաքների:  Որպես մարդ, որը 5 տարի է կանգնում է կառավարության դիմաց ու ակցիաներ է իրականացնում, ասեմ, թե ինչպես է պետք պայքարել: Պետք է առավոտյան` ժամը 10:00-ից, գալ ու պայքարել այնքան՝ մինչեւ ձեր հարցը չլուծվի, ոչ թե գալ 5 րոպե կանգնել լրագրողների առաջ, նկարվել, թե՝ տեսեք, եկել ենք, որ իրենց հեռուստացույցով ցույց տան, իրենք էլ ասեն, որ իբր գործ արեցին: Այսպես չեն պայքարում, էս սաղ սուտ է, էս ժողովրդին ուղղակի խաբում են: Մենք կարող ենք հաղթել, եթե պայքարելը չդադարենք, հրապարակից չգնանք ոչ մի տեղ:

Ես երկար տարիներ Ռուսաստանում եմ ապրել, բայց այս 5 տարի է գալիս-գնում եմ, որովհետեւ իմ սիրտը ցավում է, որ իմ հայրենիքը, իմ հայ ժողովուրդն այս վիճակում է: Այսօր Արցախը տվեցին, վաղը տալու են Ջերմուկը, մյուս օրը Սյունիքն են տալու, Սեւանը: Այս գործընթացը կանգ չի առնելու, եթե միջանցքը բացեն, թուրքերը մտնելու են ու իրենց Թուրանն են այստեղ սարքելու, հայ ժողովրդին ոչնչացնելու են ու մեզ թողնելու են առանց հայրենիքի: Ու այսօրվա օրով ամենավիրավորականն այն է, որ ես իմ հետեւորդներին սոցցանցերում կոչ եմ անում գալ հրապարակ, Արցախի ժողովրդի համար պայքարել, ուրեմն՝ ինձ էլ պետք է ձայն տալ, որ կարողանում առկա խնդիրների մասին բարձրաձայնել: Իսկ եթե իմ բերանը փակում են, ուրեմն՝ իրենք պլանավորված են ամեն ինչ անում, ուրեմն՝ իրենց պետք էր մարդկանց  ուղղակի ցրել, որ պայքարը չստացվի, ու էլ Արցախի ժողովուրդը չուզենա հավաքվել: Էլեմենտար մի բան ասեմ, դուրս են գալիս հարթակ ու սկսում են տեքստը կարդալ, արդյո՞ք սա հարգանք է Արցախի ժողովրդի հանդեպ, այսպե՞ս են պատրաստվել հանրահավաքին: Եթե դա իրենց մտքերն են, ինչի՞ համար են կարդում: Իսկ եթե կարդում են, թող կարդա այն մարդը, ով այդ տեքստը գրել է իրականում, եւ ով ուզում է այնպես անի, որ այս մարդիկ էլ չգան հավաքներին:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝