Պուտինն ու Թրամփը նորից ակնարկեցին, որ Իրանի թեման կարեւորագույնն է

Այսպիսով, ո՞րն էր Պուտինի ու Թրամփի երեկվա այդքան աղմուկ բարձրացրած հեռախոսազրույցի ամենաէական արդյունքը: Իհարկե, կարելի է մի շարք դրվագներ առաջնային համարել: Շատ կարեւոր է բուն փաստը, որ երկու առաջնորդներն ինչ-որ բաներ են պայմանավորվում, դա համարում են դրական եւ խոստանում են` շարունակել նման պայմանավորվածությունները: Մոսկվայի համար, իհարկե, շատ կարեւոր է, որ ԱՄՆ-ի եւ Ուկրաինայի պայմանավորված զինադադարի սցենարը փաստացի դուրս մղվեց` փոխարինելով այլ սխեմայով, թեեւ Թրամփը մինչ այդ սպառնում էր, որ եթե Մոսկվան չընդունի, խնդիրներ կառաջանան: Այսինքն, Պուտին կարողացել է իր տեսակետը դարձնել առաջնային: Կարեւոր է նաեւ, որ ուկրաինական ուղղությամբ համատեղ առաջադրում են կոնկրեը ուղղվածություն եւ հիմա կզբաղվեն դրանով: Կարեւոր դետալ է, որ Եվրոպան վերջնականապես է դուրս մնում այս գործընթացից` ստանձնելով իրադարձություններին պասիվ հետեւողի դեր: Կարեւոր է, որ երկկողմ խոսում են տնտեսական խոշոր նախաձեռնություններից եւ այդպես շարունակ:

Սակայն մեկնաբանները հիմնականում շրջանցում են մեկ «փոքրիկ» դետալ, որը հնչեց Սպիտակ տան մեկնաբանություններում: Այն է` «Երկու առաջնորդները կիսում են այն տեսակետը, որ Իրանը երբեք չպետք է հայտնվի Իսրայելին ոչնչացնելու դիրքերում»։ Բավականին «խուճուճ» միտք է, նման է, որ բառերը հատիկ-հատիկ ընտրել են, բայց էլի այդ «խուճուճությունը» մնում է:

Ուրեմն, սա կարեւո՞ր է: Պակտերացնենք այսպես. հիմնականում խոսում են ուկրաինայից, երկկողմ հարաբերությունենրից, բայց ահա, պարզվում է, որ Մերձավոր Արեւելքը եւս քննարկել են: Ու այն խորությամբ, որ ստիպված են եղել այդ մասին խոսել բառերը ընտրելով: Ու հաշվի առնելով, որ այս պահին հենց Մերջավոր Արեւելքն է դառնում Երրորդ աշխարհամարտ առաջացնելու կարգի պայթյունավտանգ գոտի, այդ քննարկումն ինքնին շատ կարեւոր է: Երկրորդը, այդ մասին հայտարարեց միայն Սպիտակ տունը, եւ ինչի մասին խոսում է, դա ավելի նման է ամերիկյան կողմի ցանկության: Բայց այսպես. Իրանը ոչ թե զինաթափվի, ոչ թե պարի ամերիկյան դուդուկի տակ, այլ ընդամենը «չպետք է հայտնվի Իսրայելին ոչնչացնելու դիրքերում»: Ավելի նման է` չզինվելու պահանջը դռնում է այլ բան` երաշխիք, որ Իրանը չի ոչնչացնի Իսրայելին: Հարաբերությունների կարգավորման, թե ինչ տարբերակով, դա դետալների հարց է: Նաեւ, որ այդ երաշխիքը Վաշինգտոնը սպասում է Մոսկվայից, այն է` Վաշինգտոնը Մոսկվային է տեսնում Իրանի հետ հարց լուծողի դերում: Եվ այդ լուծումը կարող է ամենապայթյունակ գատվածի` Մերձավոր Արեւելքի համար լուծում դառնալ: Ու եթե սա պայմանավորվեն, Ուկրաինայում էլ Թրամփը, ինչպես ցույց տվեց զրույցի ողջ հատվածը, պատրաստ է շատ բան զիջել Մոսկվային: