Դարավոր կշեռքների ցուցադրման ավարտին մնացին հաշված օրեր

Ռուսական արվեստի թանգարանում (պրոֆ. Ա. Աբրահամյանի հավաքածու) դեռեւս նախորդ տարվա վերջին տեղի ունեցավ «Կշեռք» պատմագեղարվեստական ցուցահանդեսի հանդիսավոր բացումը։ Ցուցահանդեսը, որը միջթանգարանային համագործակցության օրինակելի նախագիծ է, ներկայացնում է վաղ միջնադարից մինչեւ 20-րդ դարի կեսերը ստեղծված կշեռքներ՝ հավաքված Հայաստանի տարբեր թանգարաններից ու մասնավոր հավաքածուներից։ Ցուցադրության ավարտին մնացել են հաշված օրեր՝ մինչեւ ապրիլի 1-ը։

«Հնագույն կշռաքարերն ու կշեռքները պատկանում են Հայաստանի պատմության թանգարանի ֆոնդին, եւ ներկայացված նմուշներից հնագույնները համարվում են 6-7-րդ դարերի Բյուզանդական ժամանակաշրջանի կշեռքները, ինչպես նաեւ 11-13-րդ դարերի Դվին եւ Անի քաղաքների կշեռքները: Բյուզանդական կշռաքարերը, որոնք 6-7-րդ դարերից են մեզ հասել, գտնվել են Դվին քաղաքից: Կան նաեւ 11-13-րդ դարերից բերված մեկական կշեռքներ՝ Դվին եւ Անի քաղաքներից: Պատմության թանգարանի ֆոնդում յուրահատուկ տեղ են գրավում նաեւ մետաղադրամ կշռելու կշեռքները, որոնք թվագրվում են 18-19- դարեր՝ Վանից եւ Ախլցխայից բերված: Կշեռքները ինչպես հայկական գաղթօջախներից են բերված, այնպես էլ պեղված են բուն Հայաստանի տարածքից, օրինակ՝ Հայաստանի գաղթօջախից է բերված ոսկու կշեռքը, որը գործածվել է մինչեւ 1952-1980-ական թվականները՝ մինչ էլեկտրական կշեռքների կիրառությունը», - մեզ հետ զրույցում մանրամասնեց Ռուսական արվեստի թանգարանի տնօրեն ՄԱՐԻՆԵ ՄԿՐՏՉՅԱՆԸ:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝