Պարոնյանցիների «Կնոջս անունը Մորիս է» կատակերգությունը ներկայացվեց Գավառում

Մարտի 15-ին Լևոն Քալանթարի անվան պետական ​​դրամատիկական թատրոնի բեմում տեղի ունեցավ Հակոբ Պարոնյանի անվան երաժշտական ​​կոմեդիայի պետական ​​թատրոնի «Կնոջս անունը Մորիս է» ներկայացումը՝ «Թատերական երկամսյակ» ծրագրի շրջանակներում։ Հանրահայտ ֆրանսահայ դրամատուրգ Րաֆֆի Շարթի կատակերգությունը պատմում է հարուստ փարիզեցու՝ Ժորժի մասին, ով շփոթվում է սիրախաղի բարդության մեջ։ Նրա սիրուհին ցանկանում է ամուսնանալ նրա հետ, բայց նա չի պատրաստվում բաժանվել իր կնոջից, ով հանդիսանում է նրա հարստության աղբյուրը։ Երբ սիրուհին սպառնում է բացահայտել ամեն ինչ Ժորժի կնոջը, նա խնդրում է մի օտար տղամարդու՝ Մորիսի, հանդես գալու որպես իր կինը և վախեցնել սիրուհուն։ Բայց իրավիճակը դառնում է անկառավարելի, և ոչինչ չի ընթանում այնպես, ինչպես նախատեսված էր...

 

 

Թատրոնի գլխավոր ռեժիսոր Հակոբ Ղազանչյանի բեմադրությունը առաջին րոպեներից գրավեց հանդիսատեսի ուշադրությունը։ Հետաքրքիր երկխոսությունները, անսպասելի սյուժետային շրջադարձերը և անկեղծ դերասանական խաղը (Իշխան Ղարիբյան, Սամվել Դանիելյան, Հասմիկ Գևորգյան, Արթուր Պետրոսյան, Լարիսա Ղևոնդյան, Տիգրան Նահապետյան) յուրահատուկ մթնոլորտ էին ստեղծում բեմում: Ներկայացումն ընդունվեց բուռն ծափահարություններով, և հանդիսատեսը երկար ժամանակ թույլ չտվեց դերասաններին հեռանալ բեմից։

 

 

Նշենք, որ ՀՀ Գեղարքունիքի մարզպետ Կարեն Սարգսյանի նախաձեռնությամբ և ՀՀ ԿԳՄՍ նախարարության աջակցությամբ Գեղարքունիքի մարզում արդեն երրորդ տարին է, ինչ անցկացվում է «Թատերական երկամյսակ» ծրագիրը: Այս տարի թատերական երկամսյակի մեկնարկը տրվեց մարտի 8-ին և նվիրվեց Կանանց միջազգային օրվան։ Ծրագրի շրջանակներում Լևոն Քալանթարի անվան պետական դրամատիկական թատրոնում իրենց լավագույն ներկայացումներով հանդես կգան ՀՀ մայրաքաղաքի և մարզային մի շարք թատրոններ։