«ԽԻԶԱԽՈՐԵՆ ԿՌՎԵԼ Է ՈՒ ԸՆԿԵԼ ՇՈՒՇԻՈՒՄ, ՔԱՐԻՆՏԱԿՈՒՄ ԹԵԺ ՄԱՐՏԵՐԻ ԸՆԹԱՑՔՈՒՄ». ՀԵՐՈՍ ԱՆԴՐԱՆԻԿ ԱՊԵՐՅԱՆ

Փետրվարի 25-ը, Արցախյան 44-օրյա դաժան պատերազմի անմահ հերոս ԱՆԴՐԱՆԻԿ ԱՐԳԱՄԻ ԱՊԵՐՅԱՆԻ ծննդյան օրն է, կդառնար 24 տարեկան։ Ծնվել էր 2001֊ին, Արմավիրի մարզի Վանանդ գյուղում։ Նրա շիրիմին են այցելել հարազատներ, ընկերներ, համագյուղացիներ, ծաղիկներ խոնարհել և խնկարկել։ Նրա ընկերը, Iravunk. com -ի հետ զրույցում նշեց. «Քանի որ լեգենդար զորավար Անդրանիկ Օզանյանի ծննդյան օրն է ծնվել, անունը Անդրանիկ են դրել։ 2012֊ին ընտանիքով տեղափոխվեցին ՌԴ։ Այնտեղ Անդրանիկը շատ կարճ ժամանակում սովորել է լեզուն, սովորել է գերազանց, մասնակցել օլիմպիադաների ու առաջին տեղը գրավել։ Ուզում էր շարունակել ուսումը, բայց նախընտրեց հայրենիքին պարտքը տալ։ 2017֊ին եկավ Հայաստան։ Միշտ ափսոսանքով էր նայում Արարատ լեռանը, մեր հողերին ու ամեն անգամ ափսոսում, վրեժով լցվում ու երազում էր հետ բերելու մասին։ Շատ ուշադիր էր ծնողների հանդեպ, երկու եղբայր էին, քույր չունեին։ Անդրանիկը զորակոչվեց Հայոց բանակ, ծառայում էր Արցախի Եղնիկների զորամասում։ Ծառայում էր գերազանց։ Պատերազմի թեժ օրերին հասցնում էր զանգել, շատ հպարտ ու ոգևորված խոսում էր, նա էր մեզ ոգեշնչում։ Ասում էր, հանկարծ չվախենանք, իր հետ ամեն բան կարգին է։ Նրան ընտրել էին հետախույզ իր գիտելիքների և խելացի լինելու համար։ Եղել է հենց Քյոխի խիզախ զինվորներից։ Անդրանիկը պատերազմի առաջին օրերից մասնակցել է Եղնիկների, Կուբաթլուի և Շուշիի թեժ մարտերին։ Խիզախ կռիվներ տալուց հետո ընկել է Շուշիում, Քարինտակում, թեժ մարտերի ընթացքում, նոյեմբերի 7֊ին։ Իսկ նրա հետախույզ լինելու մասին ծնողները իմացել են միայն անմահանալուց հետո։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ ԱՆՄԱՀ ՀԵՐՈՍ, ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ....

Պատրաստեց ՀՈՎՀԱՆՆԵՍ ՍԱՐԳՍՅԱՆԸ