Ընդհանրապես` Ռոբը եղե՞լ ա. ԸՆԿԵՐ ՓԱՆՋՈՒՆԻ

ԳՅՈՒՄՐՎԱ ՏՐՆԳԻ

(ՓԱՐԱՔԱՐՈՒՄ ՔՊ-Ի ԹԵԿՆԱԾՈՒԻՆ ԸՆՏՐԵԼՈՒ ՀԱՄԱՐ ԻՐԱՎԱՊԱՀՆԵՐԻ ԵՎ ՔՐԵԱԿԱՆՆԵՐԻ ՀԱՄԱՏԵՂ ՊԱՅՔԱՐԻ ԼՈՒՐԵՐԻ ԿԱՊԱԿՑՈՒԹՅԱՄԲ)

 Ըստ քաղտեխնոլոգների` մինչև ընդդիմադիրները կսկսեն «Կոնսենսուս - 1» ՔՊ-ին հեռացնելու գործընթացը, Փարաքարում արդեն իշխանություններն ու քրեական ենթամշակույթը սկսել են ՔՊ-ն վերարտադրելու «Կոնսենսուս +1» գործընթացը։

 **

 ԺՈՂՈՎՐԴԻ ՏՐՏՈՒՆՋԸ

(ԴԱՎԹԱՇԵՆ ՎԱՐՉԱԿԱՆ ՇՐՋԱՆԻ ԱՇԽԱՏԱԿԱԶՄԻ ԳԼԽԱՎՈՐ ՔԱՐՏՈՒՂԱՐ ԱԼԲԻՆԱ ԱՀԱՐՈՆՅԱՆԻ ԿՈՂՄԻՑ` ԿԱՐՄԻՐ ՇՈՐԵՐՈՎ ԻՐԵՆՑ ՈՐԱԿՄԱՄԲ «ԱՂԻ ԲԼԻԹ- ՎԱԼԵՆՏԻՆ» ԱՇԽԱՏԱՆՔԱՅԻՆ ՓԱՐԹԻ ԿԱԶՄԱԿԵՐՊԵԼՈՒ ԿԱՊԱԿՑՈՒԹՅԱՄԲ)

 Մեր սեւ սիրտը` ձեր վարդագույն փարթին։

 **

 ՄԵՂԱ ԱՍՏԾՈ

 ( ԳՅՈՒՄՐԻՈՒՄ ՔՊ-Ի ՍԱՐԻԿԻՆ ԷԴՄՈՆ ՄԱՐՈՒՔՅԱՆԻ ԵՂԲՈՐ ՕԳՆՈՒԹՅԱՆ ՀԱՍՆԵԼՈՒ ԼՈՒՐԵՐԻ ԿԱՊԱԿՑՈՒԹՅԱՄԲ)

Ըստ թեոլոգների, միայն Մարուքյանի եղբայրների մոտ կարող է այդպես լինել, որ մեկը Նիկոլի աչքի գերանը տեսնի, մյուսը` չտեսնի։

**

ԴԱՍԱԿԱՆ

 (ՎԱՐԴԱՆԻԿԻ ԵՐԳԸ` ԳՅՈՒՄՐԻՈՒՄ ԻՐԵՆ ԱՍՖԱԼՏԻՆ ՊԱՌԿԵՑՆԵԼՈՎ` ԲԵՐՄԱՆ ԵՆԹԱՐԿԵԼՈՒՑ ՀԵՏՈ)

Խեղճ բլուրս ձեր սարիկին վնաս չէ, վնաս չէ...

 **

 ՁՅՈՒՆ ԳԱ ԳԼԽԻԴ

 (ՁՅԱՆ ՏԵՂՈՒՄՆԵՐԻ ՊԱՏՃԱՌՈՎ ԵՐԵՎԱՆԻ ԱՎՏՈՏՐԱՆՍՊՈՐՏԸ ԿՈԼԱՊՍԻ ԵՆԹԱՐԿՎԵԼՈՒ ԿԱՊԱԿՑՈՒԹՅԱՄԲ)

 Ըստ օդերեւութաբանների` վերոնշյալ երեւույթի պատճառը, ամենայն հավանականությամբ, ձյունը սկզբից նստել է քաղաքապետարանի աշխատակազմի գլխին։

**

ԿԱՐՈՏԱԽՏ

Լեննականի կալբասի գործարանից հայտնում են` Նիկոլենք Գյումրին էն օրը քցեցին, որ գյումրեցիները սկսեցին Վարդանիկի ժամանակներին երանի տալ:

**

ՈՐԲԻՆ ՀԵՐՈՒԹՅՈՒՆ ԿԱՆԵԻ

Ըստ ՄԱԿ-ի սոցիալական հանձնաժողովի`ԱՄՆ-ն Եվրոպային անչափահաս դառնալու պատրվակով այլեւս ալիմետ չի վճարելու, ձողը լրիվ կտրում ա:

**

ՈՐԴԻՆԵՐ ԵՎ ՉԵՂԱԾՆԵՐ

(«ՊՐԻՎԵՏ ՌՈԲԸ ՉԻ ԵՂԵԼ», ԼԵՎՈՆ ՔՈՉԱՐՅԱՆԸ` ՀՈՐ ԱՐԱԾՆԵՐԸ ՀԵՐՔԵԼՈՒ ԿԱՊԱԿՑՈՒԹՅԱՄԲ)

«Պրիվետ Ռոբը» չի եղել, որ Ռոբը «Կոնգրես» հյուրանոցը համեմատեր բոմբաներկայի հետ, չի եղել, որ կոշիկները հանդի նասկիներով տուռնիկ բարձրանա, չի եղել, որ «Գրանդ Քենդիում» հայտարարի, թե մանկուց մտածում էր` ոնց են կոնֆետի մեջ ջեմ լցնում, եւ ընդհանրապես` Ռոբը եղե՞լ ա: