Քրեական ոստիկանները հայտնաբերել են բնակարանային գողություններ կատարած տղամարդկանց

ՆԳՆ ոստիկանության Կոտայքի մարզի օպերատիվ կառավարման կենտրոն փետրվարի 22-ին ստացված ահազանգը բնակարանային գողության մասին էր: Նոր Գեղ համայնքի 65-ամյա բնակիչը հայտնել էր, որ տնից եւ ավտոտնակից գողություն են կատարել։

Քրեական ոստիկանության Կոտայքի մարզային վարչությունից մեկնել է օպերատիվ խումբ։ Տանտերը հայտնել է, որ փետրվարի 20-ից 22-ն ընկած ժամանակահատվածում խոհանոցի պատուհանը հարմարեցված գործիքով բացել, մտել են տուն եւ հյուրասենյակից գողացել հեռուստացույց, այնուհետեւ վերցնելով ավտոտնակի բանալիները՝ այնտեղից գողացել են տարբեր իրեր: Կազմված փաստթղթերը ներկայացվել են Նաիրիի քննչական բաժին:

Քրեական ոստիկանության գլխավոր եւ Կոտայքի  մարզային վարչությունների քրեական ոստիկանների համատեղ ձեռնարկած օպերատիվ-հետախուզական միջոցառումների արդյունքում պարզվել է, որ գողությունը կատարել են Բյուրեղավանի 39-ամյա եւ 47-ամյա երկու բնակիչ: Կոտայքի մարզի քրեական ոստիկանների եւ պարեկների ձեռնարկած միջոցառումների արդյունքում փետրվարի 24-ին նրանք հայտնաբերվել, ձերբակալվել եւ տեղափոխվել են Կոտայքի մարզային վարչություն, որտեղ խոստովանել են արարքը, ինչպես նաեւ հայտնել, որ գողություններ են կատարել նաեւ տարբեր մարզերում:

Բյուրեղավանի բնակիչ տղամարդիկ ներկայացվել են նախաքննական մարմին: Գողոնը մասամբ հայտնաբերվել է։ Կատարվում է նախաքննություն:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝