Ապօրինի զենք-զինամթերքի շրջանառության դեմ պայքարը շարունակում է. արդյունքները՝ թվերով

Հրազենի գործադրմամբ կատարվող հանցագործությունները, ծանր հետեւանքներից բացի, նաեւ ստանում են հանրային լայն հնչողություն` ձեւավորելով իրավիճակը առավել խիստ միջոցներով վերահսկելու ընդհանրական պահանջ։

Ապօրինի զենք-զինամթերքի շրջանառության դեմ պայքարը շարունակում է մնալ Ներքին գործերի նախարարության առաջնահերթություններից, եւ այս ուղղությամբ առավել ինտենսիվ են ինչպես հայտնաբերման եւ առգրավման, այնպես էլ բնակչության շրջանում տարվող բացատրական աշխատանքները։

Միայն փետրվարի 17-ին եւ 18-ին ՆԳՆ Քրեական եւ Համայնքային ոստիկանության տարածքային մի շարք ստորաբաժանումներում արձանագրվել է ապօրինի պահվող զենք-զինամթերքի կամավոր հանձնման 15 դեպք, երկու օրում հանձնվել է ընդհանուր՝ 91 միավոր զենք, մասնավորապես՝ 2 գնդացիր, 30 ինքնաձիգ, 2 նռնականետ, 20 մարտական եւ 1 գազային ատրճանակ, 11 ակոսափող եւ 25 ողորկափող հրացան։

Քրեական ոստիկանության Արմավիրի, Արագածոտնի, Կոտայքի, Գեղարքունիքի, Շիրակի, Վայոց ձորի մարզային եւ Երեւան քաղաքի վարչություններում կամավոր հանձնվել են գնդացիրներ, ինքնաձիգներ, նռնականետ, ակոսափող եւ ողորկափող հրացաններ, ատրճանակներ, նռնակներ եւ տարբեր տեսակի զինամթերք։

Համայնքային ոստիկանության Սեւանի, Ճամբարակի, Տավուշի, Ախուրյանի, Կապանի, Արմավիրի, Նոյեմբերյանի բաժիններում էլ արձանագրվել են ինքնաձիգներ,  հրացաններ, նռնականետ,  ատրճանակներ, նռնակներ եւ ռազմամթերք կամավոր հանձնելու դեպքեր։

Նշենք, որ միայն այս տարվա հունվարի 1-ից փետրվարի 18-ը ՆԳՆ Քրեական ոստիկանության եւ Համայնքային ոստիկանության, ինչպես նաեւ Պարեկային ծառայության կողմից հայտնաբերվել, առգրավվել, նաեւ՝ կամավոր հանձնվել է ընդհանուր 398 միավոր զենք, անցած տարվա նույն ժամանակահատվածի համեմատ՝ 126-ով ավելի։

Ապօրինի պահվող զենք-զինամթերքի հայտնաբերման եւ առգրավման գործընթացը հետեւողականորեն շարունակվում է։

Հիշեցնենք․ ապօրինի պահվող զենք-զինամթերքը կամավոր հանձնողն ազատվում է քրեական պատասխանատվությունից: Մինչդեռ, երբ իրավապահներն են հայտնաբերում, քրեական պատասխանատվությունն անխուսափելի է, ընդհուպ՝ ազատազրկում։

Ներքին գործերի նախարարությունը հորդորում է՝ նաեւ քրեական պատասխանատվությունից խուսափելու համար ապօրինի պահվող զենք-զինամթերքը կամավոր հանձնել իրավապահ մարմիններին։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝