Ի՞նչ են ծխում գործադիրում. ԶԱՐՄԱՆՔ

Նիկոլ Փաշինյանի կենակից ԱՆՆԱ ՀԱԿՈԲՅԱՆԸ շարունակում է խոհափիլիսոփայական գրառումներ կատարել՝ իր «Կրթվելը նորաձեւ է» արշավի շրջանակում: Հիմա էլ նա ասում է. «Պատմությունը դասեր է տալիս, ոչ թե բեռ դառնում, եւ որքան ավելի ազնվորեն ու պատասխանատվությամբ ենք վերաբերվում մեր անցյալին, այնքան ավելի ամուր հիմք ենք դնում մեր ապագայի համար»: Բայց ո՞ւմ է ասում, երբ կողքին նստածը, ինչ իշխանության է եկել, ջնջում է մի ողջ ազգի ու պետության անցյալն ու պատմութունը: Թե՞ Աննան կամաց-կամաց որոշել է համալրել ընդդիմության շարքերն ու հենց Փաշինյան Նիկոլին է սկսել բշտել: Ո՞վ իմանա…

Մինչ տեղացող ձյան պատճառով մայրաքաղաքի տրանսպորտը երեկ կաթվածահար էր, քաղաքացիներն էլ աշխատանքից հետո մնացել էին տան ճանապարհի կեսին՝ սառած ու զայրացած, զուգահեռ իրականության մեջ երեկոյան գրառում է կատարել ՀՀ կառավարության աշխատակազմի ղեկավար ԱՐԱՅԻԿ ՀԱՐՈՒԹՅՈՒՆՅԱՆԸ: Նա կառավարության շենքից երեւացող տեսարանից տեսանյութ է հրապարակել եւ գրել. «Մեր գլխին թափվող մեգաաղմուկի մեջ չենք նկատում, թե ինչպես է փոխվում եղանակը, ինչ սքանչելի տեսարաններ է հրամցնում մեզ: Բայց այդ աղմուկի նպատակներից մեկն էլ հենց բոլորիս անհաղորդ պահելն է այս գեղեցիկ պատկերներից»: Այսքանից հետո կրկին շարունակում է ակտուալ մնալ այն հարցը, թե ի՞նչ են ծխում գործադիրում:

Իրականությունից կտրվել է նաեւ հայտնի արեւմտամետ Արման Բաբաջանյանի կուսակցության փոխնախագահ դարձած քաղաքագետ ՌՈՒԲԵՆ ՄԵՀՐԱԲՅԱՆԸ: Ուկրաինայի զինված ուժերի գլխավոր շտաբի պետի կեցվածք ընդունած՝ վերջինս ո՛չ ավել, ո՛չ պակաս հայտարարել է. «Ուկրաինան շարունակելու է ջարդել Ռուսաստանի ատամները՝ լինի Ամերիկայի հետ, թե՝ առանց»: Հատուկ Մեհրաբյանի համար հիշեցնենք, թե ինչ է հենց երեկ ասել ԱՄՆ փոխնախագահ Ջեյ Դի Վենսը. «Ո՞րն է Ուկրաինայի պլանը։ Մեկ այլ օգնության փաթեթ։ Արդյո՞ք գիտակցվում է իրականությունը տեղում՝ ռուսների թվային գերազանցությունը, եվրոպացիների սպառված պաշարը, կամ նրանց ավելի սպառված արդյունաբերական բազան: Նախագահ Թրամփը գործ ունի իրականության հետ, ինչը նշանակում է գործ ունենալ փաստերի հետ»: Դե Ջեյ Դի Վենսն ի՞նչ իմանար, որ Ուկրաինան, որպես «բոյեվոյ զապաս», դեռ պահում է Մեհրաբյան Ռուբոյի ատոմային զենքի էֆեկտ ունեցող «հուժկու» խոսքը: Լրջացեք, պարոնայք…

Ի դեպ, Գյումրիի նախկին քաղաքապետ ՎԱՐԴԱՆԻԿ ՂՈՒԿԱՍՅԱՆԸ երեկ իրեն ձերբակալելու, ապա ազատ արձակելու շոուից հետո՝ ամենայն լրջությամբ լրատվամիջոցներից մեկի հետ զրույցում հայտարարել է. «Եթե ինձ բանտարկեն, ամբողջ աշխարհի առաջ կխայտառակվեն։ Ամբողջ աշխարհում մարդիկ սպասում են, եթե սրանք իմ դեմ ինչ-որ բան անեն, դու տե՛ս, ես սրանց գլխին ինչ եմ բերելու։ Ես բանտում էլ լինեմ, էնքան ինձ հարգող մարդիկ կան, որ տես՝ ինչ կլինի սրանց գլխին»: Ասեք, որ քամին ցրտից մեռավ: Բա չասե՞ս, ամբողջ աշխարհն ի՞նչ արեց Բաքվում դատվող Արցախի ռազմաքաղաքական գործիչների համար, որ քո համար ի՞նչ պետք է անի: Կամ՝ Գյումրիից դուրս ո՞վ է ճանաչում Ղուկասյան Վարդանին, երբ անգամ Ռուբեն Վարդանյանին են մոռացել: Եվ, ընդհանրապես, Նիկոլի օրոք քաղբանտարկյալների պակաս երբեք չի եղել, ինչո՞ւ Ղուկասյանն իրեն հարգող մարդկանց չդիմեց, տեսնեինք՝ ի՞նչ կլիներ այս իշխանության գլխին:

Զարմացած է «Իրավունք»-ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝