Մեր երեխաներին պետք է սովորեցնենք տարբեր տեսանկյուններից նայել պատմական տարբեր իրողություններին․ ԿԳՄՍ նախարար

Պատմական փաստերի փոփոխություն մենք ընդհանրապես չենք իրականացնում: Պատմությունն այն է, ինչ տեղի է ունեցել։ Մենք մեր երեխաներին պետք է սովորեցնենք վերլուծել և տարբեր տեսանկյուններից նայել պատմական տարբեր իրողություններին, ունենալ պատմական մտածողություն: Սա է մեր կարևոր խնդիրը: Պատմությունը նույնն է, ինչ որ միշտ։ Այս մասին լրագրողների հետ զրույցում նշեց ԿԳՄՍ նախարար Ժաննա Անդրեասյանը՝ անդրադառնալով վերջին շրջանում պատմության դասագրքերի նկատմամբ հանրության մոտ առկա դժգոհություններին։

Հարցին՝ ինչպե՞ս է դասագրքերում ներկայացվել Ցեղասպանության հարցը, Հայ դատը, Արցախյան պատերազմները, նա արձագանքեց. «Թե ինչպե՞ս է ներկայացվելու մասնագիտական հարցը, դասագրքերը գրում են մասնագետները և մասնագետներն են որոշում ինչպես ներկայացնել։ Մեր պահանջը հետևյալն է, որ մեր երեխան ունենա հնարավորություն ծանոթանալու պատմական տարբեր իրադարձություններին, դեպքերին, երևույթներին, դրանք վերլուծել, տարբեր եզրահանգումներ անել, հասկանալ պատճառները, հետևանքներն ու օրինաչափությունները:

Ձեր մատնանշած բոլոր դեպքերն ու իրադարձություններն էլ շատ կարևոր են, մեր, որ մեր երեխաները հետևություններ անեն և կարողանան նաև մեր այսօրվա իրավիճակը ճիշտ գնահատել»: