Զորի Բալայանը բոլորեց 90-ամյակը. հայտնի վիրաբույժ որդին բացառիկ մանրամասներ է պատմել տարեդարձից. ՖՈՏՈ

Մեծանուն գրող, հրապարակախոս, արցախյան ազատագրական պայքարի ակունքներում կանգնած ԶՈՐԻ ԲԱԼԱՅԱՆԸ բոլորեց 90-ամյակը: Թե ինչպես է մտավորականը նշել տարեդարձը, «Իրավունք» բացառիկ մանրամասներ է պարզել որդուց՝ հայտնի վիրաբույժ ՀԱՅԿ ԲԱԼԱՅԱՆԻՑ:

— Պարոն Բալայան, ինչպե՞ս եք նշել հայրիկի տարեդարձը:

— Մեր երկրի այս ծանր վիճակով եւ իր առողջական խնդիրներով պայմանավորված՝ մեծ շուքով, ինչ-որ ռեստորանում չենք նշել, այլ` տանը: Բայց տարեդարձն անցավ շատ ջերմ, ուրախ մթնոլորտում՝ ընտանիքի անդամների, թոռնիկների հետ:

— Ումի՞ց է շնորհավորանքներ ստացել 90-ամյա Բալայանը:

— Ինչպես Հայաստանից, այնպես էլ աշխարհի տարբեր հատվածներից զանգերի տարափ էր: Շնորհավորանքներ է ստացել թե՛ գրչակիցներից, թե՛ գաղափարակիցներից, թե՛, պարզապես, իր բարին կամեցողներից: Ես էի անընդհատ հեռախոսազանգերին պատասխանում, միացնում էի բարձրախոսը, որպեսզի ինքն էլ լսեր: Գրողների միությունից է շնորհավորական նամակ ստացել, անգամ բարոնուհի Քերոլայն Քոքսն է իր բարեմաղթանքները հղել: Շատերն օրվա ընթացքում այցելեցին՝ թեկուզ 5-10 րոպեով նրան տեսնելու, ձեռքը սեղմելու եւ շնորհավորելու համար:

— Իսկ ինչպե՞ս է հիմա պարոն Բալայանի առողջական վիճակը:

— Որ այսպես մնա, էլի, փառք Աստծո: Կարեւորը՝ թող մեր կողքին լինի: Իրականում մենք բոլորս ավելի շատ ենք ուրախացել՝ հոբելյանի առթիվ, որովհետեւ սկսած իր 50 տարեկանից, միշտ անհանգստանում էինք հայրիկի առողջության համար: Երկու վիրահատություն է տարել, անցել արցախյան ծանրի տարիների բովով: Նա անբացատրելի ռեժիմ ուներ, միշտ վախենում էինք, որ իրեն մի բան կլինի: Բայց, փառք Աստծո, 90 տարեկանն ենք նշում:

ԻԼՈՆԱ ԱԶԱՐՅԱՆ

Հ.Գ.- «Իրավունք» թերթի եւ ՍԻՄ կուսակցության անունից ի սրտե շնորհավորում ենք Զորի Բալայանին՝ նրա 90-ամյակի կապակցությամբ։ Հոբելյանը լավագույն առիթն է` հիշելու նրա անուրանալի ու գաղափարական պայքարի մասին, որը նա թողել է մեր ժողովրդի պատմության մեջ։ Նրա անսահման նվիրվածությունը հայրենիքին, գրական ու հրապարակախոսական աշխատանքները միշտ ոգեշնչել են սերունդներին՝ շարունակելու պայքարել ազատության ու արդարության համար։ Նա վառ օրինակն է, թե ինչպիսի ուժով ու նվիրումով է անհրաժեշտ գործել՝ հայրենիքի ու նրա ժողովրդի համար ճակատագրական պահերին։ Զորի Բալայանի խոսքը միշտ համարձակ է եղել, ուղենիշ՝ ճշմարտության, որոնք բազմիցս հրապարակվել են նաեւ «Իրավունք» թերթի էջերում: Մաղթում ենք ամենակարեւորը՝ քաջառողջություն եւ վերականգնված ու վերամիավորված Հայաստան ու Արցախ՝ հանուն ինչի նվիրել է իր ողջ կյանքը:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝