Վաղուց էր պետք հրաժարվել «Եվրատեսիլից»՝ անկախ նրանից կար այլընտրանք, թե՝ ոչ. Մհեր Մեսրոպյան

Մոսկվայում կանցկացվի «Интервидение» երաժշտական ​​մրցույթը

Ըստ lenta.ru կայքի, Ռուսաստանի Դաշնության նախագահ Վլադիմիր Պուտինը հրամանագիր է ստորագրել, համաձայն որի՝ 2025 թվականին ՌԴ-ում կանցկացվի «Интервидение» երաժշտական ​​մրցույթը՝ «Եվրատեսիլի» ռուսական տարբերակը: «Интервидение» մրցույթը տեղի կունենա Մոսկվայում: Հաղորդվում է, որ կազմկոմիտեի նախագահը կլինի փոխվարչապետ Դմիտրի Չերնիշենկոն։ Մրցույթի հստակ ժամկետները եւ դրա ձեւաչափը դեռ նշված չեն: Հայտնի է, որ երաժշտական ​​մրցույթին իրենց մասնակցությունը հաստատել են ԱՊՀ, ԲՐԻԿՍ, ՇՀԿ, Լատինական Ամերիկայի շուրջ 20 երկիր։ «Интервидение»-ի առաջին մրցույթը տեղի կունենա 2025 թվականի սեպտեմբերին: Այս մասին «Իրավունք»-ը զրուցել է ՀՀ վաստակավոր արտիստ, երգիչ ՄՀԵՐ ՄԵՍՐՈՊՅԱՆԻ՝ Մգեր Արմենիայի հետ:

— Ինչպե՞ս եք վերաբերվում ի հակադրություն արեւմտյան «Եվրատեսիլի»՝  ռուսական «Интервидение» ստեղծելու գաղափարին: Հայաստանը պե՞տք է մասնակիցի այս մրցույթին եւ հրաժարվի «Եվրատեսիլից»:

— Շատ ուրախ եմ, որ նման որոշում է կայացրել Ռուսաստանի նախագահ Վլադիմիր Պուտինը: Վերջապես պետք է ձերբազատվել այդ եվրոպական անհասկանալի եւ սատանիստական մրցույթից, որը կոչվում է «Եվրատեսիլ»: Այնտեղ բացի այլասերվածությունից՝ այլ բան չեք գտնի՝ ո՛չ երաժշտության եւ ո՛չ արտիստիզմի առումով: Կարծում եմ՝ վաղուց էր պետք հրաժարվել «Եվրատեսիլից», անկախ նրանից՝ կար այլընտրանք, թե՝ ոչ: Դա անիմաստ պետական բյուջեի գումարի վատնում է:

— Ինքներդ կցանկանա՞ք մասնակցել «Интервидение» երաժշտական ​​մրցույթին:

— Կարծում եմ, որ նմանատիպ մրցույթներն ավելի շատ երիտասարդների համար են: Մենք հիանալի երիտասարդներ ունենք, ովքեր իսկապես արժանի են նման հարթակում ներկայացնելու Հայաստանը, երգն ու մշակույթը: Մենք մշակութային անսահման մեծ բազա ունենք եւ պետք է այն ճիշտ օգտագործենք եւ ամենից կարեւորը՝ ճիշտ հարթակներում ներկայացնենք: Իմ կողմից միայն ողջունելի կլինի, որ մեր հայ երիտասարդ երգիչներն ամենուր պատվով ներկայանան եւ ներկայացնեն մեր երգարվեստը: Իսկ ես արդեն, դժվար թե, մասնակցեմ նման մրցույթներին: Եթե մասնակցեմ էլ, ապա միայն գուցե ժյուրիի կարգավիճակում, ինչը եւս կանեմ մեծ սիրով ու հպարտությամբ: Չէ՞ որ ժյուրիի անդամներից շատ բան է կախված:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝