Նոր կտակարանի տակից բա դուրս եկո՞ղ ես. ԶԱՐՄԱՆՔ

Թվում է, թե ՆԻԿՈԼ ՓԱՇԻՆՅԱՆՆ էլ տեղ չի թողել զարմանալու, բայց արի ու տես, որ աբսուրդի զինանոցը դեռ սպառված չէ: Հիմա էլ վերջինս հայտարարում է, որ ո՛չ ավել, ո՛չ պակաս, իր քաղաքական գործունեության սկիզբը հիմնված է Նոր Կտակարանի արժեքների վրա: Անդրադառնալով վերոնշյալին՝ քաղաքագետ Գագիկ Համբարյանը հարց է բարձրացնում. «Նոր Կտակարանի ո՞ր մասում է խրախուսվում կլյաուզնիկությունը, բանսարկությունը, գումարով հոդված գրելն ու չգրելը, դեմագոգիան, ստախոսությունը, կեղծարարությունը, զրպարտությունը, չտեսությունը, գյորմամիշությունը, տգիտությունը, որկրամոլությունը, ապուշությունը եւ պոտենցիալ հայրենավաճառությունը...»: Իսկ «Հայոց ցեղասպանության թանգարան-ինստիտուտի» նախկին տնօրեն, պատմական գիտությունների դոկտոր Հայկ Դեմոյանն առաջարկում է. «Ավետարանն ու Մեծ Եղեռնի սրբադասված նահատակների հիշատակը պղծելու համար եկեղեցին պետք է պատասխանի նզովքի ու բանադրման հատուկ կարգով»: Էհ, Նիկո՛լ, դու, որ Սահմանադրության ու Անկախության հռչակագրի տակից չես կարողանում դուրս գալ, Նոր կտակարանի տակից բա դուրս եկո՞ղ ես:

Ոչ պակաս զարմանալի է ամերիկյան Ստենֆորդի համալսարանի քաղաքագիտության դոկտոր ԱՐԹՈՒՐ ԽԱՉԻԿՅԱՆԻ դիտարկումները՝ հայ-ամերիկյան հարաբերությունների մասին: Դոկտորն ավելի քան հանրամատչելի ներկայացրել է, թե ինչ փուլում են այդ հարաբերությունները: «Իշխանությունները չեն հասկանում՝ դիվանագիտությունը ինչ է, նրանք բոլոր հույսերը կապեցին Բայդենի հետ եւ մնացին առանց ազդեցության, այս նոր ադմինիստրացիայում: Ոչ ոք իրեն չհանդիպեց: Մենք ստրատեգիական պայմանագիր կնքեցինք Ամերիկայի հետ, ստացանք տանձի պոչ, նրանք անգամ չհանդիպեցին մեր լիդերին: Էլ չեմ ասում, որ անգամ ինաուգուրացիային իրեն չկանչեցին։ Վրաստանի նախագահը այնտեղ էր, իսկ Հայաստանի ղեկավարը, որ, կներեք, այսքան իրեն ճղելով, որ մենք դեմոկրատիա ենք ուզում, Արեւմուտք ենք ուզում, ռուսներին չենք ուզում, անընդհատ ռուսներին վիրավորելով, Ղարաբաղը հանձնելով, հարաբերությունները փչացնելով Ռուսաստանի հետ, էլի չարժանացավ անգամ 15 րոպե Թրամփի հետ հանդիպման»,- ասել է քաղաքագետը News.am-ի հետ զրույցում: Մեզ մնում է միայն համաձայնել այս դիտարկման հետ, քաղցր խոսքին էլ ի՞նչ շաքար:

Ի տարբերություն Հայաստանի Հանրապետության՝ Վրաստանում իշխանությունը սկսել է ուղիղ ու անկեղծ խոսել՝ իրերը կոչելով իրենց անուններով: Ղազախստանում Վրաստանի վարչապետ ԻՐԱԿԼԻ ԿՈԲԱԽԻՁԵՆ հայտարարել է, որ ԱՄՆ դեսպանատունը եւ ԱՄՆ Միջազգային զարգացման գործակալությունը, ինչպես նաեւ NED-ը եւ այլ կառույցները համատեղ գործել են վրաց ժողովրդի եւ վրացական պետության դեմ։ Վրաստանի վարչապետը հույս է հայտնել, որ նոր վարչակազմի օրոք ԱՄՆ դեսպանատան մոտեցումը վրաց ժողովրդի եւ վրաց պետության նկատմամբ կփոխվի, եւ կդադարեցվի այն տգեղ համակարգումը, որը գոյություն ուներ դեսպանատան, USAID-ի, NED-ի եւ այլ համապատասխան կառույցների միջեւ: Ի՞նչ ասես, եթե Վրաստանի վարչապետը նոր է բարձրաձայնում այս մասին, առնվազն «Իրավունք»-ի ընթերցողները քաջատեղյակ են, բազմիցս ենք բարձրաձայնել ու ահազանգել այս կառույցների գործունեության վտանգավոր հետեւանքների վերաբերյալ: Այնպես որ, մնում է ավելացնել՝ տարոսը մեր երկրին:

Զարմացած է «Իրավունք»֊ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝