Ամո՛թ է, եթե հիմա ինչ-որ մեկը կպնդի, թե՝կոռուպցիա չունենք, առավել եւս՝ համակարգային. Նարե Արամյան

Քաղաքային տրանսպորտի թանկացման եւ դրա դեմ քաղաքացիների շարունակվող բոյկոտի մասին «Իրավունք»-ը զրուցել է Երեւանի ավագանու «Ազգային առաջընթաց» խմբակցության անդամ ՆԱՐԵ ԱՐԱՄՅԱՆԻ հետ:

— Ինչպե՞ս ստացվեց, որ նախապես 300 դրամ ուղեւվարձի գումրը փոխվեց 200-ի, այնուհետ՝ 150 դրամի: Առեւտու՞ր էր գնում՝քաղաքացու եւ քաղաքապետարանի միջեւ:

— Այս ամենը բացարձակապես անտրամաբանական է: Եկեք չմոռանանք նաեւ, որ իշխանությունն ընդդիմության հետ չի համաձայնեցրել եւ ոչ մի բան: Քանի օր է, գիշերներով, ինչ-որ ծածուկ խոսակցությունների արդյունքում, ինչ- որ բաներ են արձանագրում եւ հայտարարում ժողովրդին, թե՝հիմա որոշվեց այսպես, հետո որոշվեց՝ այնպես: Իսկ իրենք ո՞վ են, որ որոշում կայացնեն՝ առանց ավագանու: Գործադիրն իրավունք չունի անգամ նման հայտարարություններ անել եւ Ձեր ասած՝ շուկայական հարաբերությունների մեջ մտնելու քաղաքացու հետ: Սա ուղղակի էթիկապես հակաէսթետիկ վարք է:

— Քաղաքապետը հայտարարել էր, որ հետդարձի ճանապարհ չկա, սակայն, ինչպես տեսանք, կա եւ այժմ մեկ ուղեւարձը կազմում է 150 դրամ: Ըստ Ձեզ, սա ի՞նչ 300 դրամանոց խաղ էր եւ արդյոք Նիկոլ Փաշինյանի ազդեցությյունը տեսնում եք այս հարցում:

— Մենք շատ լավ ժողովրդական ասացվածքներ ունենք, բայց որպեսզի դրանց չանդրադառնանք, կասեմ, որ մենք գիտենք, թե նրանք որքանով են իրենց խոսքի տերը եւ որքանով է նրանց խոսքը բխում ժողովրդի շահերից: Ակներեւ է, որ նրանք ոչ միայն իրենց խոսքի տերը չեն, այլ այդ խոսքը որեւէ կերպ չի բխում ժողովրդի շահերից: Իսկ թե իրենց վրա ովքե՞ր են ազդում, կարծում եմ՝ միայն իրենց աթոռը պահելու ու իշխանությունից զրկվելու վախը:

— Այն արկղերը որոնց մեջ քաղաքացիները գցում էին 100 դրամանոցները, արժեր 141 հազար դրամ: Գնվել է նմանատիպ 155 արկղ: Ի՞նչ է լինելու այդ արկղերի ճակատագիրը:

— Իսկ ի՞նչն է իրենց օրոք երբեւէ արժեցել նորմալ, շուկայական գնին համապատասխան: Քաղաքային իշխանության մրցույթները եւ մեկ անձով կատարվող գնումները երբ տեսնում ենք, հասկանում ենք, որ ամբողջը պայմանավորված է եւ որեւէ կերպ չի հանդիսանում արդյունավետ ծախս: Ցավոք, մենք դադարել ենք զարմանալ: Եվ ամո՛թ է, եթե հիմա ինչ-որ մեկը կպնդի, թե՝ կոռուպցիա չունենք, առավել եւս՝ համակարգային: Այսպիսի կոռուպցիոն ոչ միայն ռիսկերի, այլ նաեւ բովանդակության աճ երբեւէ չի գրանցվել:

ՆԱՆԱ ՍԱՐԳՍՅԱՆ